Imparang ni Surigao del Norte 2nd district Rep. Robert Ace Barbers dagiti napaliiwna a biddut iti disenio ti national identification card (National ID) a namagbalin nga awan kapaypay-anna -- ti kaawan ti pirma ti akinkukua iti ID ken iti mapukpukaw a PhilSys number.
Segun ken ni Diputado Barbers, adu ti maaw-awatna a reklamo nga adu ti saan a mangawat iti National ID (Philippine Identification System wenno PhilSys ID) a kas pammaneknek iti kinaasino ti agimet iti daytoy.
Kinuna ni Barbers a no awan ti pirma iti National ID, saan a maibilang ti National ID a kas pammaneknek iti kinaasino ti tao nga agimet iti daytoy.
Maibatay iti Republic Act (RA) No.11055 a naipaulog idi Agosto 8, 2018, agserbi ti National ID a kas balido a pammaneknek iti kinaasino, a mausar kadagiti transaksion iti opisina ti gobierno ken iti pribado a sektor.
TURISMO: Intayon Idiay Ayuyang Garden iti Pila, Siudad ti Laoag!
Nupay adda dusa dagiti saan a mangbigbig iti National ID a kas pammaneknek iti kinaasino, kinuna ni Barbers a saan a mapabasol dagiti agsapul iti dadduma pay a kita ti ID a kas iti pasaporte, lisensia, kdp. ta napirmaan dagitoy.
Innayon ni Barbers nga adda 16 a numero iti ngato ti ladawan ti agtagikua iti National ID, ngem saan a daytoy 'tay permanent identification number nga inted ti PhilSys apaman a nagparehistro.
Kinuna ni Barbers a kiddawenna ti palawag ti Philippine Statistics Authority (PSA), ti ahensia a nangiwardas iti Philippine Identification System, maipanggep kadagitoy a biddut iti disenio ti National ID. (Ellson Quismorio/Manila Bulletin//Lito Hilidon/Bannawag)
