Awan lugar ti China iti Benham Rise.
Daytoy ti kinuna ni Albay 2nd district Rep. Joey Salceda kalpasan ti report ti Philippine Navy (PN) nga adda dua a bapor ti China nga aglaylayag iti Benham Rise, wenno am-ammo iti Filipinas a kas Philippine Rise.
Itay Marso 1, nasaripatpatan ni Security Analyst Ray Powell dagiti bapor a “Haiyang Dizhi Liuhao” ken “Haiyang Dizhi Shihao” a naggapu iti Longxue Island iti Guangzhou, nga aglaylayag iti daya ti Luzon Strait.
Segun ken ni Diputado Salceda, no ti West Philippine Sea (WPS) ket kasla kondominium dagiti pagilian iti aglikmut daytoy, ti Filipinas laeng ti agtagikua iti Benham Rise ket awan karbengan ti China a mapan idiay.
TURISMO: Intayon Idiay Ayuyang Garden iti Pila, Siudad ti Laoag!
Masarakan ti Benham Rise iti dayaen ti Luzon ket naideklarar a paset ti Filipinas, kas sagudayen ti United Nations Convention on the Law of the Sea (UNCLOS) iti 2012.
Kinuna ni Salceda nga umno ti ar-aramiden ni Department of National Defense (DND) Secretary Gibo Teodoro a mangpappapigsa iti kabaelan ti Filipinas a mangbantay ken mangdepensa iti baybay.
Innayon ni Salceda a makitintinnulong iti Chairman ti National Defense Committee iti Kamara a ni Dip. Boboy Tupas tapno nalaklaka a
maikkan iti pondo ti DND a paggatang kadagiti kabaruanan nga armas ken ramit militar.
Ngem kinuna ita ni PN spokesperson for West Philippine Sea Commodore Roy Vincent Trinidad, a limmabas laeng dagiti bapor ti China iti uneg ti exclusive economic zone (EEZ) ti Filipinas ket awan ti linabsingda, idinto a paset daytoy ti Freedom of Navigation Operations (FONOPS).
Nupay kasta, binaon ti Philippine Coast Guard (PCG) ti bapor a BRP Gabriela Silang (OPV 8301) a mapan agwanawan iti Benham Rise ken Batanes. (Ellson Quismorio/Manila Bulletin//Lito HIlidon/Bannawag)
