Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
NO kasano ti kinaginad ti trapiko idi kalman nga aldaw ti Domingo, nakarkaro pay ita nga aldaw ti Lunes. Degdegan pay daytoy ti kasla aleng-aleng a panagpayapay-panagwagis ti traffic aide iti nagsapalan ti Sagittarius St. ken Quirino St. a mangisamsamira iti panagingat ken panagsanapsapna.
Nakarkaro pay idi maisikko ni Johnny ti kotsena iti Sangandaan nga agpa-Sta. Ines. Agtallopulo la ngata a metro ti natarayda, dandani saanen nga agkuti ti trapiko iti kakanawanan a lane.
“Linia dagiti mapan dita Santa Ines,” kinuna ni Elmer. “Kayatna a sawen, adu ti makilaban.”
“Kasanon no awanton ti kalabantayo?” kinuna ni Jong.
Galiera Queen (MAUDI A PASET)
“Pagdanagam, aya?” inrungiit ni Dex. “Kaska la agdadamo. Sa la mangrugi ti soltada iti alas onse. Isu nga adu ti tiempotayo nga agpili iti labanantayo.”
Pagam-ammuan, nagtaraok ti maysa kadagiti manok nga adda iti karton a saklot ni Dex. Simmungbat ti adda iti bangir a dibision, sa ti para pasippit nga adda iti single a karton a saklot ni Jong.
“Ayos!” kinuna ni Elmer. “Naragsak dagiti manoktayo!”
“Baka agkampeontayo!” kinuna met ni Jong.
Nagsakuntip ni Dex. “Dimo dildillawen tapno di masukal!” kinunana.
Umas-asidegda iti galiera, kumarkaro met ti ginad ti trapiko. No mano a minuto sa makastrek ti maysa a lugan iti gate. Mangrugin nga agsawaw ti puyot ti guardia iti silbatona.
Kalpasan ti tallopulo a minuto a panagurayda iti gate, naiserrek met laeng ni Johnny ti luganda. Naimbag ta saan nga agsaiddek ti kotsena.
Tapno di maktangan uray dagiti manokda, indissaag ni Johnny iti sango ti ridaw ti galiera. Anabaab pay laeng ti nangsabat kadakuada ket ammoda lattan a kabarbaraan ti panagaatar.
Kas iti sigud, sinagid ni Elmer ti timid ti para awat iti tiket iti ridaw. “Talagang gumaganda ka, sweetheart,” kinunana.
“Tse! Mamaya patulan kita, eh! Bakit, kaya mo pa ba?” inggarikgik met ti babai.
“Tuloy kayo dun!” intudona ti lamisaan nga ar-aribungbongan dagiti mammallot. “Diyan magpalista at magbayad.”
Sabali manen a duapulo a minuto sa nadanon ti batang da Ella nga agbayad iti entry fee ken maikkan iti leg band dagiti manokda. Ket manipud dita, simminan da Ella ken Johnny kada Elmer. Inayabanda ni Jong nga agbantay iti makupin a kulongan a pakaipupokan dagiti manokda no nayataren dagitoy.
Inukrad ni Jong ti makupin a kulonganda iti likudan ti pagpapaagasanda iti manok. Inruar met da Elmer ken Dex dagiti ilabanda sa pinugsitanda iti danum a nakayuperan ti ngipen ti kimat ti rupa, kilikili ken luy-ongda. Kalpasanna, inkulongda dagitoy tapno makainanada iti panagkukotda iti karton.
Nakilinnetlet ni Elmer kadagiti kumunolkunol a nagubba iti manok a sumirsirpat iti pangilabananda kadagiti manokda. Uray no addada iti ruar ti pagataran no agkinnursonadada mangaladan iti numeroda.
Idi namnamaen ni Elmer a nakainanan dagiti manokda, sinublina ni Dex. “Agbantayka,"’" kinunana ken ni Jong.
Iti ringside, pimmanaw met la da Ella ken Johnny ta sagsaggaysa pay la ti tao. Inawis ni Johnny ni Ella iti restaurant ti galiera pangur-urayanda iti panangrugi ti soltada.
Iti panangtantannawagna iti uneg ti pagataran, nadlaw ni Elmer a kaaduanna a dadakkel dagiti manok dita. Iti ruar, adda babassit, adda dadakkel. Isu nga inanusanna laengen ti nakisinnirig iti ruar. Ket saan a nagbayag, nakakita iti mabalin a paris ti manokda a darisayen nga umasul ti gurongna. Darisayen met laeng nga umamarilio ti bukotna ken nakusnaw nga amarilio ti gurongna.
Pinerrengna ti kataebna a nagubba iti nakursonadaanna a kalaban ti manokda. “Okey yata ang mga manok natin, pare. Ibaba mo!” kinunana a bulonna a nagmasngaad.
Nagtungpal ti maysa. Kinitana ti manokna ket uray la nagtingig iti panangsirigna iti manok ni Elmer.
Tinumeng ni Dex ti bukot ni Elmer. “Nasabsabang ti bukotna,” kinunana.
Tinaliaw ni Elmer ni Dex. Kiniddayanna daytoy. “Uray ta nataytayagtayo,” kinunana. Pinaliiwna ti kasangsangona no naawatan daytoy ti kinunana. Kasla awan nangngeg daytoy ta itultuloyna a minulagatan dagiti gurong ti manok ni Elmer. Nadlaw met ni Elmer ket pinasangona iti saklotna ti manokna
Inipus ti kinaritna ti manok daytoy. “Kahig, pare. Mas mataas ang manok mo, eh!” kinunana.
Adda naggilap iti muging ni Elmer. “Pinatangkad ko ang manok ko, pare!” insungbatna. “Kailangang ihanda ang manok kung panlaban. Vitamins at hindi bahaw o tutong ang ipakakain para di mabansot! Baka di pa nakatikim ng vitamin ang manok mo at kanin lang ang ipinakakain mo!” Pinarukibanna ti karkaritenna idinto ta impasikadna ti manokna.
Ngem imbes a mainsulto ti kalabanna, immisem ketdi sa pinerrengna ni Elmer.
“Okey, laban!” kinuna a bulonna a timmakder.
Saan a nakauni ni Elmer. Di mamati a kasta ti kapardas ti panagdesision ti kinaritna. Isu a timmakder ket inipigna ni Dex. “Ania ti makunam?” inyarasaasna. “Mairupaam?”
“Husto ti kunam, nataytayag ti manoktayo. Diak mabigbig no akintao kadayta. Siguro, dayo,” insungbat ni Dex.
Kinita manen ni Elmer ti manok ti kasupangetna. “Sige,” intung-edna. Intedna ti darisayen ken ni Dex ket innalana ti alimbuyogen tapno isublatna a yatar. “Inkay' mangala iti numeroyo,” kinunana.
Agtultuloy ti panagsangpet dagiti manok. No adda mayatar a tallo wenno uppat iti uneg ti pagataran, kasta met laeng ti bilang dagiti sumrek. Isu nga inanusan laengen ni Elmer ti nangkita iti mabalin a pangyataranna iti manokda iti ruar. Madamdama, adda nangkalbit iti abagana manipud iti likudanna. Nagbuelta. Pinababa-pinangatona. Tao ni Gino, ti aw-awaganda iti Porong Bayawak.
“Baka itong manok ko ang hinahanap mong labanan!” kinuna ti kataeb ni Elmer. Iti kinalukmegna, kunam la no tian pati bakrangna. Agan-anikki a nagmasngaad. “Ibaba mo ang manok mo, ‘igan!”
Kinita ni Elmer ti manok ti nangkarit kenkuana. Brown red a nakangisngisit dagiti dadakkel a matana. Kunam la no paid ti ipusna. Basbassit ngem ti manokna.
Nasmasngaad met ni Elmer. Inipusna ti manokna ket impasikadna iti manok ni Porong Bayawak. Uray la nagkirem ni Elmer ta nagatipukpok ti darat idi nagpanerper dadgiti payak ti manok ni Bayawak iti panangduklosna iti kaatarna. Pagpiaanna, naigawid ti apona.
Miningmingan a naimbag ni Elmer ti manok ni Porong Bayawak. No saan nga imported, island born, wenno itlog a naisangpet iti Filipinas sa napapessaan ditoy.
“Mas maliit ang manok ko pero okey lang sa akin, “ indusngi ni Porong Bayawak. “May tari naman pareho, di ba?”
Nagpanunot ni Elmer. Adda la ketdi inalat daytoy a manok, naisipna. No saan, apay nga ipatangadda? Ken agresibo, kas paneknekan ti panagragut daytoy itay agpinnasikadda. Ket dayta ti mabalin a paginnabakanda. Nalisi ti manokna, agur-uray ket no bakser koma, ‘tay kunada a counter puncher. No binnanggaan, bentahe ti manokna ti kaatiddog dagiti sakana. Ken no inabakda idin ti maysa a manok ni Gino, apay koma a saan a maulit? Isu met a dumteng ni Dex.
“Manok ni Gino dayta,” inyarasaasna ken ni Elmer.
Kasla awan nangngeg ni Elmer. Tinung-edanna ni Porong Bayawak. “Sige!”
“Labanam?” sinaludsod ni Dex.
“Wen. Kasano a masubok ti kalidad dagiti gatgatangentay' a manok no kabutengtayo a dungparen dagiti kunkunada nga ari-ari iti pallot?” insungbat ni Elmer.”Sige, inkay' mangala iti numero.”
Saanen a naguni ni Dex. Sinurotnan ni Porong Bayawak a nagturong iti lamisaan a pagalaan iti numero dagiti mayatar nga entry. Napan met ni Elmer iti yan ni Jong a mangbambantay iti immuna a nayatar a manokda tapno baliwanna nga amirisen ti tadem dagiti tadina.
Iti restaurant ti galiera, saan nga impabus-oy ni Johnny ti panangitulod ti serbidora iti orderda ken Ella a merienda. Idi agbatingting ti kahera a pangipakaammona a nakasaganan ti orderda, timmakder a dagus ni Johnny.
“Bay-am nga isuda ti mangi-serve,” kinuna ni Ella.
Ngem kasla di nangngeg ni Johnny. No ammom la koma, nakunana ketdi iti unegna. Madadaanak a mangiserbi iti kasapulam tapno maipakitak laeng ti panangipategko kenka. Ngem kasla ketdin adda nangyarasaas kenkuana: “Arem mata, bain baga!”
No ania la ket unay ti adda ken ni Ella. Nakaad-adu ti planona nga ibaga, iti nakaur-urnos pay a palabra, no agwayasda iti balasang. Ngem no agsangsangodan, dina ammon no kasano nga irugina. Narigat met no kunana lattan: ‘Kayatka nga asawaen, El. Ayabakon da ina ken ama no umaykamin dumanon.’ A, ngem saanen nga uso ti danon. Kadagitoy a tiempo, makaammon nga agplano dagiti maseknan. Ipakaammodanto lattan kadagiti dadakkelda no naurnosdan ti amin pati simbaan ket agatendarto lattan dagiti nagannak ken kakabsatda iti seremonia iti simbaan ken reception iti restaurant.
Nagduaan ni Johnny nga iniggaman ti tray a naglaon iti orderda a palabok ken nalamiis a tsaa. Siaannad a nangidisso kadagitoy iti lamisaanda sa inggaw-atna ti tray iti lamisaan iti asidegda.
Nalpasda a nagmerienda a di man la nakapanunot ni Johnny iti topiko a pagsaritaanda koma. Wen, yanamongna lattan no adda ibaga ni Ella. No saan agtung-ed lattan. Ania ngarud, tinabtabbaawanna lattan ti bagina idi mapanda iti yan da Jong ken Dex a mangbambantay kadagiti manokda. Dida nadanon dita ni Elmer. Awanen ti agaatar. Kayatna a sawen a naipupoken dagiti entry ket ur-urayenda laengen ti panangrugi ti soltada.
Madamdama, dimteng ni Elmer iti yan da Ella. “Manok ni Gino ti maysa a kalabantayo,” impakaammona ken ni Ella. “Diak ammo no akinmanok iti maysa. Siguro, dayo.”
“Apay nga isu pay ti napilim?” kinuna ni Ella.. “Matibay ang mga manok niya.”
“Inabaktayo idin, di gamin? “ kinuna met ni Elmer. “Saan nga amin a lahi dagiti agab-abak a puli ket mangabak. Kas met iti tao. Apay a ti nakasaysayaat ti pakasasawanna nga agassawa ket makayanakda iti barisuweng? Apay a ti maysa a maton nga ama ket makayanak iti agpadi? Mabalin a natawidda dayta a kinaimbag iti immun-una a henerasionda. Mamatiak a kasta met dagiti manok, he-he-he!” Nakilinnipak iti dakulap ken ni Dex a kankanayon a kumanunong kenkuana no mangibisik iti nauneg bassit a kapanunotan. Pudno a nalaingka, boss, kuna latta no kua daytoy.
Nagkasarakas, nasipat sa napuyotan ti mikropono. Say-a ti simmaruno a nangngeg dagiti tao.
“Tapos na ang ulutan!” kinuna ti para waragawag ti management. Sixty pares ang entry. Dalawa ang entry ni Mister Andres Bitangcol, dalawa rin kina Gino Alvarez, Roy Segura, Andoy Lechon. Bobong Enriquez, Ricky Cojuangco, at iba pang inanyayahan natin. Gusto naming malaman ninyo na sa unang pagkakataon, sumali ang tinaguriang prinsesa ng Santa Ines Cockpit Arena, ang seksing si Ella!”
Bimtak ti sultip ken sipsipat. Iti yanda, timmakder ni Ella idi maiturong kenkuana ti panagkita dagiti nakabigbig kenkuana ket agkatkatawa a nangingato kadagiti imana.
“Sikat ka na, boss!” kinuna ni Dex.
Nakialamano met ken ni Ella dagiti adda iti asidegda.
“Mag-umpisa tayo nang eleven thirty,” intuloy ti para waragawag.
Madamdama, batang met ti naka-megaphone ti nagpakdaar. “One, two, three, four, five, magpatari na. Bawal magpatari sa labas. Uulitin ko, bawal magkabit ng tari sa labas. Madi-disqualify ang di susunod sa patakaran ng management! May gaffers’ room, aircon pa, at doon kayo magkabit ng tari.”
“Maikamanotayo?” sinaludsod ni Ella.
“Thirty nine ti Mel Simm. Forty eight met ti Black Alabama,” insungbat ni Dex.
Kinita ni Ella ni Johnny. “Inta pay agbuya, BBJ,” kinunana a bulonna a nangkawit iti takiag ti baro.
“Ang suwerte naman ang binatang yan!” adda nagkuna.
Mangal-alunos met ti panagkita ti dadduma a nangsiput kadagiti nakalinlinis a lakko ni Ella.
“Apay a palubosan ‘ta boyfriend-na nga agsuot iti kasta? No siak, for my eyes only dagita a gurong, dagita a luppo, ken dayta makagargari a patong. Hayyyyyyy, apo, aya!”
“Magkakaibigan lang kami!” Kapilitan a nagsao ni Elmer baka makaisao dagiti tao iti dina magustuan ket makakabil. Kasla inaudi ngamin a kabsatna ti pangibilanganna ken ni Ella.
Kinudkod ni Johnny ti teltelna ta awanen ti bakante a tugaw iti ringside. Pagpiaanna, adda dagiti kristo a nakadlaw ken ni Ella. Pinayapayanda da Ella sada timmakder tapno pagtugawenda ti balasang ken ni Johnny. Pinidil met ni Ella ti takiag dagiti kristo sakbay a nagtugawda kas pangbigbigna iti inaramid dagitoy.
Madamdama, addan iti sango ti ridaw nga agturong iti gradas ti umuna ken maikadua a paris nga aglaban. Idi kuan, uppaten a paris ti agur-uray iti sango ti ridaw. Saan a nagbayag, pinastreknan ti umuna a paris iti ridaw. Bimtak ti sipsipat.
Talaga nga awan pagpisipisan, iti man ringside wenno bleachers. Iti ringside, adda pay nakamasngaad iti sango dagiti nakatugaw idinto ta nagpuskol dagiti agtatakder iti espasio a nagbaetan ti disarming a gradas ken dagiti umuna nga intar ti tugaw.
Iti bleachers, kakaasi dagiti agtatakder a mangibisbislin iti uloda tapno makitada laeng ti mapaspasamak iti gradas. Adda payen dagiti agtatakder kadagiti tugaw ta naokupar pati sanguanan dagiti nagtugawanda. No kuan makilinnetlet dagiti naka-shorts a teenager a babbai nga aglaklako iti makan, pagpalamiis, naiplastik a danum, ken sigarilio. Kasla awan aniamanna kadakuada no madingpil dagiti lallaki dagiti barukong ken pus-ongda. Ti nasken kadakuada, agbiagda met. Makalakoda tapno adda igatangda iti kasapulanda iti pagtaenganda. No madlawda a mairanta ti pannakalagudda, dilatan wenno libbianda lattan nga umis-isem ti nanglagid kadakuada.
“Diak maawatan,” kinuna ni Johnny. “Nagadu ti klase ti sugal a saan nga aglilinnetlet dagiti tao, apay a kastoy ti panagdupudopda iti galiera?”
Nagkatawa ni Ella. “Exciting ti pallot, BBJ. No makipalpallotka koma, mariknam no kasano ti ganasna. Makapagagar. Dudua ti aglaban a pagpiliam. No mangabak ti manokmo, kasla pinarmekmo metten iti duelo ti akinmanok iti kalaban ti manokmo! Adda pay gunggonam. Very exciting talaga. Padasem!”
Ngem nagmusiig ni Johnny. Dina la ketdi kayat nga igasanggasat iti pallot ti matgedanna iti klinika a supapak ti adu a rigatna iti no mano a tawen a panagadalna. An-anusanna laeng ti sumursurot iti galiera gapu ken ni Ella. Ngem kasano nga ibagana dayta ken ni Ella?
Inwaras met ni Ella ti panagkitana iti ringside. Iti batogna iti ballasiw ti ring, adda iti batog ti naganna iti paladpad ti ring ni Bitangcol a nakasikkawil a nangsaklot iti kasla masikog a clutch bag-na nga ammo lattan ni Ella a napunno iti kuarta. Kaabayda ti dua a gayyemna a tahor.
Adda met iti umuna nga intar iti batog ti agdan ni Gino. Kas iti sigud, nagaruat daytoy iti lumabaga a t-shirt a nangbegkes iti daplat a barukongna. Naipinas ti naka-gel a buokna ket lalo a limmawa ti nabungkong a mugingna.
Adu pay ti nairupaan ni Ella a masansan a makitkitana ditoy Santa Ines ngem dina ammo ti naganda. Adu pay ti aglanglanga a bigtime a pagarupenna nga addaan met iti entry.
Ngem kas iti sigud, ad-adu nga amang dagiti gagangay nga agpuspusta laeng. Maibilang kadakuada dagiti di makagatang iti sukat ti marisrisayan a sandaliada, ngem nakaturtured a mangipusta iti nagrigatanna a tinegged iti konstruksion ayatna laeng nga umadu imbes nga igatangna iti iduolna iti pamiliana. Mairupaan pay ni Ella ti dadduma kadagiti agkarkariton nga agsuksukain kadagiti naisako a basura iti subdibisionda, dagiti agmalmalem nga agpedpedal iti padyak iti panagpasadada.
Agalas dosen idi maipakaammo a mangrugin ti soltada. Bimtak ti sipsipat ken paswit. Simmaruno ti anabaab.
“Unang maglalaban ang Bitangcol Warriors at Marauders!” impakaammo ti agiwarwaragawag.
Sangapulo laeng a segundo, nagkuripaspasen ti entry ti Marauders. Ket inapalan ni Ella ti siglat ti manok ni Bitangcol.
Apagbiit dagiti soltada. Manmano ti makalusot a dehado. Ken kas namnamaen dagiti pumapago, manok dagiti bigtime ti agab-abak. Isu nga agsisipol ti sennaay dagiti dehadista a mangnamnama iti dakkel nga abakenda ta kaaduanna ti sampu-anim a pinnusta. Iti sabali a bangir, tumurtured met dagiti liamadista ket tunggal mangabakda, idakdakkelda ti ipustada iti sumaruno a soltada. Maibilang kadagitoy ti agabalayan a kanayon a mangsipsiput kadagiti luppo ni Ella.
Isuna laeng ta ikarkarigatan ita ti naluklukmeg a lakay a di mingmingan dagiti luppo ni Ella. No saanna a mateppelan, taldiapanna laeng ket kumita manen iti ring. Naminsan, pinaludipan met ti nakutkuttong ni Ella. Ngem kas iti kallabes a panangpakaritna iti riknana, in-inut ketdin nga imlay ti karit. Ket idi kidagen ti abalayanna, impalagipna kampay idi nga agkonsentret daytoy iti pallot iti gradas a saan ket nga iti kinaseksi ni Ella amangan ta agmalasda manen.
Iti booth ti management iti abay ti agdan, nakisinnenias ti kahera iti kasador. Insarang met ti kasador ti maysa a ramayna. Impakdaar met ti para waragawag a maysan ti score ti Bitangcol Warriors.
Nagtultuloy ti panangdomina dagiti liamado kadagiti dehado. Gapu itoy, mapatpatamnayen dagiti babassit a pumupusta. Kasano ngamin ket naglayon ti panagabak dagiti liamado agingga iti maikasangapulo ket lima a soltada.
Ngem iti maikasangapulo ket innem a soltada, namurmurayan dagiti dehadisda ta naminsan la a nagdinnungbar dagiti manok, nagkuripaspasen ti liamado idi agdissoda.
Manipud iti dayta, nagparikuten dagiti naayat iti regla wenno mangikurkur-it iti agus ti laban tapno adda giyada nga agpusta. Kasano ngamin, mangabak maminsan ti liamado, mamindua ti dehado. No saan mamindua ti liamado, maminsan ti dehado. Wenno binnales laeng. Maabak pay dagiti nakatartaraki a manok dagiti bigtime saan la nga iti Santa Ines no di pay ket kadagiti kabangibang a galiera.
Ngem idi madanon ti laban ti umuna nga entry ni Gino, nalmes ti timek dagiti dehadista iti pannakamurmuray dagiti liamadista. Uray ni Ella, kasla adda mangdurdurog kenkuana a mangpusta iti manok ni Gino. Kasano ngamin ket dakdakkel ti darisayen a manok ni Gino ngem iti darisayen met laeng a kalabanna. Dakkel pay ti ulo daytoy ken kasla di madigdigos ta di naurnos dagiti dutdotna.
“Pumustata, BBJ?” kinuna ni Ella. “Pamadasan.”
“Sika, a,” insungbat ni Johnny. “Dua a nagsaruno a Wala ti nangabak. Baka Meron met ita.”
Ngem nangabak ti Wala. Agpadada a grabe ti sugatda, ngem nakasippit ti Wala sakbay a nagkuripaspas. Saanen nga inulit ni Ella ti pimmusta ta yamakna a makurangan ti ipustana kadagiti manokna.
Kasla adda iti nawatiwat a biahe a naglugan iti bus ti panagrikna ni Ella iti kapaut ti panagurayda iti batangda. Ngem nakagin-awa idi mairamanda iti nayawag nga agpatadi idi agalas tres iti malem.
“Ay, salamat!” nayesngawna ket uray la insadagna ti ulona iti abaga ni Johnny iti pannakagin-awana.
Ania ngarud, immawer met ti kettang ni Johnny iti pannakalang-abna iti banglo ni Ella. Sige, agsadagka latta, kayatna nga ibaga ngem nagpangngadua. Ania, no mapanunot ni Ella a gunggundawayanna ti panagpasig daytoy kenkuana. Ti nasken marikriknana ken malanglang-abna ti bara ken banglo ti babai a reyna dagiti rinabii a tagtagainepna.
“Paalala! Huwag magkabit ng tari sa labas!” impalagip manen ti naka-megaphone.
Tinung-edan ni Elmer ni Dex. Inruar met ni Dex ti darisayen iti kulongan ket sinurotna ni Elmer.
Iti kaaduda nga aggigiddan nga agikapet iti tadi, nagbalin a nailet ti kuarto dagiti labahero. Isu nga uray la naslep iti ling-et da Elmer ken Dex idi makaiwakasda. Inruar ni Dex ti plastik a botelia a naglaon iti danum a nakayuperan ti ngipen ti kimat, inyawatna ken ni Elmer, ket pinasuyotan met ti naud-udi ti rupa ken luy-ong ti manokda. Nagugis ni Elmer idi rummuarda iti kuarto ket pinaspasarakan met ni Dex a tinulad ta napanunotna a bareng makatulong iti birtud ti ngipen ti kimat.
Intulod ni Elmer ni Dex iti pilaan nambaranna a mangkita iti kalaban ti manokda. Addan nga agpayso ti kalabanda iti pilaan. Inipig ni Elmer ni Dex.
“Pasanguem ti manok kenka ket dimo itulok nga agtuktok iti ania man. Baka adda ipitik dagiti suitik a nasabidongan a banag ket tuktoken ti manokmo aglalo ket mabisinen,” imbilin ni Elmer ken ni Dex. “No kasano ti ridammo no gagangay a laban, nakarkaro koma ita ta aginteres ti amin iti premio malaksid pay iti abakenda iti pinnustaan.”
Nagkikinnamat met ti tung-ed ni Dex. “Ako pa!” intung-edna nga umis-isem.
Napan ni Elmer iti yan da Ella ken Johnny. “Mano ti iparadam iti darisayen?” sinaludsodna iti balasang.
“Minimum bet laeng. Makaammokan no mano ti isurotmo. Sigurado a dehadotayo ket nauneg ti tawagan. Pumagoakto,” kinuna ni Ella.
Kas kadagiti immuna a soltada, kapautan ti sangapulo ket walo a segundo a kabayag dagiti sarunuenda a laban. Ania ngarud ket napilpili dagiti manok. Malaksid ngamin iti abakenda a pusta ken premio, agsapsapul pay dagiti mammallot iti pammigbig ken pammadayaw.
Madamdama, bimtak ti nakapigpigsa a dir-i ken palagapag. Ammo lattan ni Elmer a ti dehado iti sarunuenda a soltada ti nangabak.
Saanen a masapul nga ibaga pay ni Elmer a batangdan ti sumaruno a soltada. Binay-an ni Dex a mayulog ti naabak a manok sa sinabatna ti nangabak iti arsadanan ti agdan ti ring. Inaprosanna ti bukot ti manok sa inyaprosna iti manokna. Pangabakem met, a, kinuna iti unegna.
“Datayon ti lumaban!” kinuna ni Johnny idi makitana nga umul-ulin ni Dex.
“W-wen!” Iti umuna a gundaway, nagtigerger ti boses ni Ella. Kinitana met ni Dex a nagubba iti darisayen.
“Susunod na maglalaban ang Northern Luzon Star ni Ella at ang Lightning I ni Gino Alvarez!” impakaammo ti para waragawag.
Ammo ni Dex a dehadoda isu a maglayon iti puesto ti Wala. Iti Meron, kasla awan ranta ti handler a mangidisso iti manok ni Gino. Senseniasan ti para pasippit nga ibabana ti manokda tapno ipasikadda, ngem parparaenna daytoy.
Saan a nagbayag, nakaulin ni Elmer a nagubba iti pagpasippitda. Inasitgan ti kasador.
“Magkano ang parada ninyo?” sinaludsod ti kasador.
“Eleven,” insungbat ni Elmer. Ninayonanna ti kuarta ni Ella.
Insublat ti kasador ti Meron.
Kinita ti handler ni Gino. Insenias met ni Gino ti otsenta.
Nupay kasta, tallo laeng a tahor ti intudo ti kasador, napataranen ti pusta ni Gino.
Iti nagtugawanda, kinalbit ti naluklukmeg a lakay ti abalayanna. “Kasano, ‘balayan?” kinunana. “Agsusuerte ni Ella, ngem manok met ni Gino ti kalaban ti manokna.”
“Mapanta ken Gino, 'balayan,” kinuna met ti nakutkuttong. “Siempre, saan a pipitsugin ti isalog ni Gino iti kastoy a laban.”
Nagsenias ti timer sa kinuerdasanna ti relo ti galiera. Insenias met ti sentensiador nga umulogen iti ring dagiti para pasippit ken dadduma pay nga awan ti akemda iti gradas.
Inyawat ni Dex ti darisayen ken ni Elmer, ket inawatna met ti lasak a pinagpasippitna.
Inubba met ti handler ti manok da Bitangcol sa inikkatna dagiti nabasa a tapok a dimket kadagiti kuko daytoy.
Immuna ni Elmer a nakasukto iti baina ti manokna isu a ti manokna ti inuna ti sentensiador a pinunasan iti kapas nga adda alkoholna ti tadina.
Sineniasan ti handler ni Gino ti sentensiador. Ti sentensiador ti nangukas iti linas a bedbed ti tadi ti manokna, pinunasanna ti tadi sa nagpuesto iti nagbaetan dagiti handler.
Pangabakem kadi ti manokko, apo, indawat ni Ella iti unegna, a dina ammo no asino ti pangituronganna iti dawatna.
Bigla a nagsardeng ti kinnarit iti pusta idi isenias ti sentensiador ti larga sa siaalisto a pimmanaw iti nagbaetan dagiti agibbet.
Sipsiputan ni Elmer ti kalabanna bayat ti panagsabatda iti tengnga ti gradas. Nangatngato met ti manokna ngem ti kalabanna iti panagpinnaayatda. Sa nakatantanang a nagsanud, piniritna ti piditpidit ti manokna sa nakaan-anat a nangidisso iti daytoy.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8 | 9 | 10 | 11
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
