Pampanunoten dagiti opisial ti Department of Transportation (DOTr) ti pannakaaramat ti makunkuna nga expropriation power ti gobierno tapno saan a maitantan ti pannakairingpas ti Metro Manila Subway Project (MMSP) gapu kadagiti parikut iti right-of-way.
Ti "expropriation power" (wenno eminent domain) ket ti bileg ti turay a mangala iti pribado a sanikua a mausar para iti pagsayaatan ti publiko, apaman a maipaay ti nainkalintegan a subad iti makinkukua iti daga, kas sagudayen ti Section 9, Article III iti Konstitusion.
Ngem inlawlawag ni DOTr Undersecretary for Rails Jeremy Regino a daytoy a bileg ti maudi a pamuspusan ti gobierno a mangrisut kadagiti parikut iti right-of-way saan laeng nga iti MMSP, no di ket iti dadduma pay a proyekto ti gobierno.
Kinuna ni Regino a no awan latta ti mabukel a tulag kadagiti makinkukua iti daga, awanen sabali a pamuspusan no di mangipila iti expropriation proceedings iti korte.
Manipud Kadagiti Agdama a Kameng ti Bannawag: Dios ti Agngina!
Impanamnama ni Regino a malpas ti 33-kilometro a Metro Manila Subway, ti kaunaan a subway iti Filipinas, inton 2029. (Aaron Recuenco/Manila Bulletin//Lito Hilidon/Bannawag)
