Nagballaag dagiti agsuksukisok manipud iti Department of Science and Technology-National Research Council of the Philippines (DOST-NRCP) maipanggep iti yaadu dagiti estudiante nga agpampannuray lattan iti Artificial Intelligence (AI), ken ti epekto daytoy iti akademia.
Iti Annual Scientific Conference (ASC) and 91st General Membership Assembly a naangay itay Marso 12, impaganetget ni NRCP Director Dr. Bernardo Sepeda nga idinto nga umad-adu dagiti estudiante nga agusar iti AI, nasken a masinunuo nga umisu ti pannakaaramat daytoy.
Kinuna ni Sepeda nga addan nabukel dagiti unibersidad a mangtarawidwid kadagiti mannursuro ken estudiante tapno maitandudo ti kangrunaan a prinsipio dagiti unibersidad ken saan ida nga ikompromiso ti AI.
Impaganetget ni NRCP Division of Engineering and Industrial Research Dr. Angelo Ervin S. Choi nga adda pay sabali a wagas tapno matakuatanda no agad-adal met laeng ti estudiante.
Manipud Kadagiti Agdama a Kameng ti Bannawag: Dios ti Agngina!
Kinuna ni Choi a nupay adda ti AI, maikkan iti gundaway dagiti estudiante a mangilawlawag iti trabahoda babaen ti oral defense ken panel discussion, tapno maammuan no pudno a putarda ti maysa a banag.
Innayon ni Sepeda nga agtultuloy latta dagiti kadawyan a wagas ti panagrukod a kas iti oral exam, written assignment, ken sukisok – tapno makitada ti kinasaririt ti maysa nga estudiante. (Rhowen Del Rosario/Manila Bulletin//Lito Hilidon/Bannawag)
