Inaprobaran ti Committee on Legislative Franchises (CLF) ti Kamara itay Marso 12 ti pannakawaswas ti prangkisa ti SMNI gapu kadagiti panaglabsing a nakita dagiti diputado bayat ti naiwayat nga imbestigasion.
Awan ti simmupiat iti pannakaipaulog ti House Bill (HB) No. 9710 a mangwaswas iti prangkisa ti SMNI nga naaddaan iti nagan nga Swara Sug Media Corporation.
Segun ken ni CLF vice chairman ken Surigao del Sur 2nd District Rep. Johnny Pimentel, umdasen dagiti testimonia a nangngeg ti komite a pammaneknek kadagiti panaglabsing ti SMNI.
Natakuatan ti komite a linabsing ti SMNI ti uppat a paset ti Republic Act (RA) No. 11422 -- ti linteg a nangipaay iti prangkisa ti SMNI -- kas iti Section 4, 10, 11, ken 12.
Manipud Kadagiti Agdama a Kameng ti Bannawag: Dios ti Agngina!
Linabsing ti SMNI ti Section 4 gapu iti panangiwaragawag daytoy iti saan a pudno a padamag (fake news).
Mainaig daytoy iti naipalnag iti maysa a programa ti SMNI nga adda kano PhP1.8-bilion a travel fund ni House Speaker Martin Romualdez.
Ngem kinuna ni House Secretary General Reginald Velasco a PhP39.6 a milion laeng ti nagastos ti Kamara kadagiti opisial a panagbiaheda.
Linabsing ti SMNI Section 10 gapu iti panagbaliw ti panagtagikua nga awan pammalubos ti Kongreso.
Malaksid kadagitoy, sinalungasing pay ti SMNI ti Section 11 a pannakaiwaras ti panagtagikua kadagiti Filipino, ken iti Section 12 gapu iti saanda a pannakatungpal kadagiti reportorial requirement.
Kalpasan a maaramid ti report ti komite, maipan ti HB 9710 iti plenario ti Kamara tapno maaprubaran. (Dexter Barro II/Manila Bulletin//Lito Hilidon/Bannawag)
