Nobela ni ARIEL SOTELO TABÁG
(Grantee, 2013 National Book Development Trust Fund para iti Nobela nga Ilokano)
24 | DANGADANG
APAMAN a nakabatog ni Miguel iti puon ti kallupit, kunam la no adda ngiwat ti kayo ta manipud ditoy, mariknana nga adda puersa a mangig-igup kenkuana. Binay-anna a maigup ket iti apagdarikmat, naipugso iti maysa a desdes a dagiti nagdadakkel a kaykayo, naglalangtoda—agbarbaresbes ti aglawlaw. Nalamiis.
Kalpasan a madaliasatna ti kabakiran, limtaw iti maysa a kadas a mabalin a namagaan a karayan. Nabato. Sinunsonna daytoy a nagpasurong agingga a nakagteng iti maysa a nakalitlitnaw a dan-aw. Mabalin a no aglipias daytoy, isu no kua ti panagadda ti danum ti nagnaanna a kadas.
Nagsarming ti asul a langit iti dan-aw ket nakalawlawag ti aglawlaw. Ngem karkardayo nga awan ni Apo Init.
Iti nagtakderanna, nailangaan ni Miguel a kabinnatogna laeng ti wangawangan ti kueba. Tinaraigidna ngarud ti dan-aw.
Galiera Queen (MAUDI A PASET)
Adda dagiti kumunolkunol ken umanabaab iti likudan ken sikiganna ngem dina ida inkaskaso. Ammona, mangmangkik dagitoy. Kayatda a pengdan iti mabalin a panagsangoda iti among dagitoy a ni Dugang.
Inruarna ti latigona tapno amano nga isaplitna laeng no adda umasideg a kabusorna. Malaksid a nadakamat ni tatangna a nabileg daytoy a panglaban ken ni Dugang, nasalsalawna met kadagiti binasbasana a daytoy latigo nga ipus ti pagi ti kangrunaan a kabuteng dagiti mangmangkik.
Kinarawana met ti punial iti likudanna. Adda. Daytoy nga igam ti panggibusna ken ni Dugang.
Adda latta met ketdi danagna. Ket inyarasaasna: “Du-dum, du-dum, du-dum, du-dum / Du-dum, du-dum, du-dum, du-du-du-dum!”
Kasta ti kompasna bayat ti yaasideg ken iseserrekna iti kueba: “Du-dum, du-dum, du-dum, du-dum / Du-dum, du-dum, du-dum, du-du-du-dum!”
Naruruar nga amang ngem iti ninamnama ni Miguel ti ayan ti gagarana. Dagus a nakitana ti impapanna nga Aribai nga isu met laeng ti Puraw a Lakay iti tagainepna. Ap-appupuen daytoy ti bugbugtong a Litaw nga impapanna nga isu ni Baras. Nakadidillaw nga adda nangisit a tali a naputipot iti tengnged ni Aribai ket ti ungto ti tali, ig-iggeman ni Dugang, ti pinarsua a barbonan a tao ti bagina idinto ta ti ulona, nangisit a kabalio. Adda ketdi bassit nga ordin daytoy iti mugingna.
Saanen a nagpamayan ni Miguel. Tinarayna a linagto a sinaplitan ni Dugang. Dagus a nagungor daytoy. Inggay-atna ti mangrugma ken ni Miguel ngem insabatna manen ti latigo. Kunam la no naikuduag ni Dugang.
Naklaat ni Miguel iti kellaat a naidumduma a kinapigsana.
Ginundawayan dayta ni Dugang ket nagtaray a rimmuar iti kueba. Sinurot ni Miguel. Simpok iti kabakiran. Sinurotna latta. No kasta a makaasideg, isaplitna ti latigo. Agungor daytoy. No dadduma, mapukaw iti imatangna. Ngem masurotanna met laeng iti naglemmengan daytoy a minuyongan, wenno rangkis, wenno sanga ti dakkel a kayo, wenno rukib. Ket, ali, ta saplit ti pamay-anna.
Agingga a saanen a makakunail ni Dugang.
Ginundawayan dayta ni Miguel. Imputipotna nga immuna ti latigo iti bagi ni Dugang. Sa kalpasanna, sinakayanna. Ngem dina pay naasut ti imuko, nagbuatiten daytoy. Kinawiwitanna ti tengnged ni Dugang, sa rinakepna ti ulo daytoy. Wang-it a wang-it daytoy ngem saan nga immibbet ni Miguel.
No kua, isamira met ni Dugang ti dumanog. Ngem malisian ni Miguel. No dadduma, ti met la bukod a bagi ni Dugang ti madanog daytoy.
Idi a naduktalan ken naamiris ni Miguel nga awan ramay dagiti ima wenno saka daytoy. Isu a dina kabaelan nga alat-aten ni Miguel.
Ket iti maysa a gundaway a nagsarimadeng ni Dugang, inkagumaan ni Miguel nga inasut ti punial a pirak. Iti amin a pigsana, imbagsolna iti teltel daytoy. Nagangek. Sa nagungor iti nakadagdagem.
Sa kunam la no adda spring ti saka daytoy a kellaat a limmagto iti nakangatngato. Sa nagkayaw-at. Pagam-ammuan, agsueken. Iti ngiwat ti maysa a bulkan!
Dagus nga immibbet ni Miguel a nangiyadayo ti bagina tapno malisianna iti pannakaipisokna iti bunganga ti bulkan a pagkanabsuokanen ni Dugang.
PANAGRIKNA ni Miguel, nalasanglasang ti bagina. Mabalin a naisalatsalat kadagiti sanga dagiti kayo ti panagkunana. Naudatal iti daga.
Mariknana, adu dagiti dunorna. Dina maitudo no ayanna ti nasakit. Wenno awan sa payen ti nasakit. Kasla pay ketdin buybuyaenna ti bukodna a bagi a naudatal.
Nalagipna ti putotna. Makasangit a maragsakan. Naaramidna met laeng ti nasken nga aramidenna para iti daytoy. Natayen ni Dugang. Wenno, naggibusen ni Dugang a maysa kadagiti ingas ti Nangisit. Nawayawayaanen ni Baras. Addan baro a biag ni Eliezer.
Nagkidiakidiap ti panagkitana. Kayatna a sawen, saanna pay a pinanawan ti mortal a bagina. Nagkiremkirem. Managsaggaysan ti dadakkel a panagangesna.
Nasaripatpatanna idi agangay ti yaasideg ti dua a nakapuraw. Nagkiremkirem manen. Nabigbigna ni Aribai. Sa ni Baras a nakapurpuraw a nagpayak a kabalio ken addaan sara a nasileng a nangisit.
Pinagkakamakam ni Miguel ti naganges. Inkagumaanna ti nagsao: “Baras, inkan... Pangngaasim… Inkan luganan ti barok a ni Eliezer….”
Kinamat manen ni Miguel ti angesna. Nagkidiakidiap ti aglawlaw. Naginnagaw ti sipnget ken lawag.
(Gibusna)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
