Imparang ni Presidente Ferdinand R. Marcos Jr. (PBBM) ti iskediulna bayat ti kaaddana iti ballasiw-taaw a kas sungbat iti pammabalaw ni dati a Presidente Rodrigo Duterte nga agpalpaliwaweng laeng isuna iti ballasiw-taaw.
Iti imatang dagiti kameng ti prensa iti Berlin, impakita ni PBBM ti iskediulna a kas iti opisial a pannakiuman kadagiti kaasmangna ken dadaulo ti negosio, a paset ti annongenna a kas Presidente, idinto nga awan ti panawenna nga agpasiar iti kaaddana iti Germany.
Iti idadar-ay ni dati a Presidente Duterte iti taripnong dagiti mangsupsuportar ken ni Pastor Apollo Quiboloy, binabalaw ni Duterte ti isasarungkar ni PBBM iti ballasiw-taaw. Kinuna daytoy a mapan laeng agpaspasiar.
Iti laksid daytoy, inlawlawag ni PBBM a saanna a perpersonalen ti insawang ti dati a presidente. (Darryl John Esguerra/PNA//Lito Hilidon/Bannawag)
