"Adda dakdakkel a parikut nga iparparangarang ti video."
Daytoy ti kinuna ti gunglo dagiti mannursuro a Teachers’ Dignity Coalition (TDC) maipapan iti naiwaras a Tiktok video ti maestra a nangipeksa iti luksawna ken nagsasawanna dagiti "awanan disiplina" nga estudiantena.
Namkuatan ti Department of Education (DepEd) a nangimbestigar iti pasamak.
Impakaasi ni TDC National Chairperson Benjo Basas iti publiko a dida koma ukomen a dagus ti maestra iti video.
Manipud Kadagiti Agdama a Kameng ti Bannawag: Dios ti Agngina!
Nupay saanda a konsintiren ti ania man a panaglabsing dagiti kakaduada a mannursuro, kinuna ti TDC a masapul a mailisi met ida iti pannakariribuk, pannakasuron, pisikal a pangta, ken pannakaibabain.
Kinuna ti TDC a masapul a kitaen met ti parikut iti disiplina dagiti ubbing iti uneg ti pagadalan, idinto a kasapulan unay dagiti ubbing ti disiplina tapno makasursuroda.
Segun iti TDC, bigbigenda ti ipatpatungpal ti DepEd a Child Protection Policy kas mayanatup iti Department Order No. 40, series of 2012; ti Anti-Child Abuse Law wenno Republic Act 7610; ken dadduma pay a polisia tapno masalakniban dagiti ubbing iti amin a kita ti pannakaabuso.
Ngem kinuna ti TDC a masapul met a masalakniban dagiti mannursuro kadagiti manggundaway wenno mangabuso kadagitoy a polisia a mangdangran kadakuada.
Imbatad ti TDC dagiti nadumaduma a kaso dagiti mannursuro a naibabain, nabutbuteng, wenno naipupok gapu iti bassit a panagkamalida.
Impaganetget ti TDC a nasken a masalakniban met ti kalintegan dagiti mannursuro ta dakkel ti akemda iti irarang-ay ken pannakaital-o ti sistema ti edukasion iti pagilian. (Merlina Hernando-Malipot/Manila Bulletin//Lito Hilidon/Bannawag)
