Naisaklang ni Kingdom of Jesus Christ (KOJC) Founder Apollo C. Quiboloy iti Regional Trial Court (RTC) ti Davao City ken ti Pasig City gapu iti kaso a seksual a panangabuso ken qualified human trafficking.
Naipila itay Marso 18 iti Davao City RTC ti kaso a panaglabsing iti Section 5(b) ken Section 10(a) ti Republic Act (RA) No. 7610, wenno ti Special Protection of Children Against Abuse, Exploitation and Discrimination Act.
Nairaman iti kaso a panaglabsing iti Section 10(a) da Jackielyn W. Roy, Cresente Canada, Paulene Canada, Ingrid C. Canada, ken Sylvia Cemanes.
Naipila met itay Marso 19 iti Pasig City RTC ti kaso a panangsalungasing iti Section 4(a) ti RA 9208, wenno ti Anti-Trafficking Persons Act of 2003.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Department of Justice (DOJ) Undersecretary Mico Clavano a saan a mapiansaan (non-bailable) ti kaso ni Quiboloy iti pangukoman ti Pasig City.
Itay met laeng Marso 19, impaulog ti Senado ti arrest order maibusor ken ni Quiboloy gapu iti panagkedkedna a sumango iti imbestigasion ti Senado mainaig kadagiti alegasion dagiti dati a kameng ti KOJC. (Jeffrey Damicog/Manila Bulletin//Lito Hilidon/Bannawag)
