Ni HONOR BLANCO CABIE
Levántate, Liwliwa, la seguridad de tu padre
en tiempos de guerra de Pinili se olvida
1
ay! manang liwliwa,* bumangonka,
ta ilik a pinili agrambak
inton dumteng petsat' kasangayna.
napia pay 'diay pinili ta adda
lagipna a pulos di maitublak,
silalagip kanayon 'ti ama.
ngem 'diay nakaikalian 'tay kadkadua
a nagbalinen a siudad batac
petsat' ipapatay** agugisda.
pinili 'diay sinapulsapulda
ngem sandataan*** 'tay awan amak
a nangsaed iti kalabanna.
5 a Daniw
'ti ili a pinili ta adda
batonlagip ken apo goyo, siak
ilemlemmes, irarrareb 'toy lua.
da sandataan a nangguarguardia
iti obispo nga anak batac
awan man la bulintik uray la
kastat' kabassit 'tay lagip koma.
* liwliwa (1913-1938) anak da gregorio aglipay
ken pilar jamias sakbay a nagkasarda idi 1939,
ni pilar agtawen iti 64 idin, ni aglipay 79.
** septiembre 1, 1940.
*** gerilia a tagabarangay iti nagili a pinili,
nangbambantay ken ni aglipay a kamkamaten
tropa amerikano idi rebolusion dagiti filipino
kontra amerikano idi 1900.
2
gemgem 'diay kanawan nga imana
imbagsolna 'ti langit batog 'diay
yan waig abay ti saksakana.
adda iparangarangna dayta:
pigsa ni filipino nga adda 'diay
labes taaw ken bukod a daga.
ni filipino nga adda't daga
a di nakaipasngayan ta sadiay
saldet puli iparangarangna.
sadiay napasnek ipamatmatna –
iti kinagaget adda rang-ay,
mangted 'tay pagsanggiran ti rikna.
ni victor ta agtaktakder latta,
iladladawannan pinoy sadiay
labes taaw ken bukod a daga.
'diay ima ipasimudaagna
kinagaget tapno dumteng rang-ay
amma, inna, kakabsat nga adda
iti nakaikalian ti kadkadua.
*agtayag 55 a metro agraman pagtaktakderanna
a lima a metro nga entablado iti igid ti waig
marikina asideg ti ortigas extension iti baetan
ti siudad pasig ken quezon.
3
nakatakder ni victor abay 'diay
pus-ong ti waig marikina, wen,
agmalmalem, agpatpatnag pangen
nga aglabas ta inda mamurmuray.
awan lalamminanna, 'tanud, siak
daytay madukotan, awan man la
naingpis nga inyarpawda koma –
ay! amangan isudat' maitublak.
ngem 'diay mensahe ni victor saan
a tagibassiten, a, ta iti
ballasiw ti taaw ken 'ti inna
dinakkelan saan a likudan.
iladladawan ni victor puli
nga addaan bagas ken bugasna.
4
kabsat, ta adda pay 'tay ugalida:
ita ta adu manen luglugan 'ti
kalsada 'ti aldaw ken rabii
rummuar kadawyan a makarapa.
agiinnipus 'diay bosina, ay!
kas karruk-atda 'diay pagparngedan,
daydiay ugalida idi kalman
ta iturongdaka a mangpatay.
awan garumiad piditpiditda
iti bosina a tumimpalos,
iti bosina a mangrumrumek --
rumbeng daytay labahas a kuna.
malaksid 'diay labahas dos por dos
koma pay 'tay inda ipalpalek.
5
adda pannakaidumana daydiay
ugali da dadduma nga innak
kalugaran nasaksaksian riknak
ken mugingko kadagiti balay.
no 'tay adda punsion a makuna
saan la a kalding daytay partien,
'tay baka pay sanguento ti pangen:
bisita ta adda pay agpidua.
ni apo nga agsangaili ta
dumawatto't dispensar ta kano
bassit met 'diay inda a maipuni --
sang-aw a makapuling 'ti mata.
kinapakumbaba, atanudko,
nalaad nga ugali ti puli.
6
"pasIensiakayon, apo, 'ti adda a
naidasarmi ditoy away. pumpunnuanyo
laengen no adda kurangna…"
--masansan a mangngeg kadagiti
dadduma a tagaaway no ipasangoda
daytay nabaknang a pagpasaran.*
kinapakumbaba ni manang ta
awan 'tay basarna nga addaan
bisked, mailubbot dagus gurongda
gapu't maisang-awda't papanganan.
adda ipasakalye a daydiay
adda 'ti dulang pagsasangnguanda
'tay nanumo mangawis 'tay ay-ay:
narigat biag lugar 'ti agdama.
maregreg a daras 'ta mukatmo
ta dika pay nakaisakmol, addan
'tay di materred a katkataymo:
itsura 'diay makan agtikrabkan.
saankan, manang, agpakumbaba,
pakumbabam awan sadaganna.
* adda met dagitay agkuna: “kastoy laeng,
apo, ti masida ditoy away ta narigat ti
kabibiag.” (ngem 'diay ipasangoda nagrasia
a pinakbet, ken dadduma pay)
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
