Salaysay ni GODOFREDO SARMIENTO HABON
IDI ubingak, sakbay a sumrekak iti elementaria, naipaspasurotak kadagiti ubbing a masursuruan iti kartilia iti simbaan ti Iglesia Filipina Independiente. Ti mangirsursuro ket daydi aw-awaganda iti birngasna nga Apong Biya. Sadiay ti nakasursuruak nga agbasa. Naminsan, nagpasalipda iti kinnalaingan iti panagbasa. Ti inaramatda a pagbasaan? Bannawag! Wen, Bannawag. Daydiay ti kaunaan a kanito a nakaiggemak ti Bannawag. Ket siak ti nangabak! Siak ti kalaingan nga agbasa! Nagunggonaanak iti maysa a dakkel a bunga ti kaimito! Manipud idin, no la ket adda simmangpeten a Bannawag a lako daydi Apong Ipay ket nakaalan daydi Apong Miliana, apaman a nalpasda a binasa ken naidissodan, libasekon nga alaen ken innak basaen idiay lemmeng.
Gapu ti Bannawag, nanayonan ti siglatko nga agbasa malaksid kadagiti adu nga adal ken sursuro a napidutko kadagiti pinanidna iti naunday a panawen a panagbasbasak.
Iti pannakadanonko ken panagnaedkon iti Kamanilaan, gapu iti panagtrabahok ditoy, intultuloyko ti nagbasbasa iti Bannawag. Ngem idi pimmanawkami iti pagkaseraanmi iti Quezon City kalpasan ti EDSA Revolution idi 1986 ket immakarkami iti Bulacan, saanakon a nakagatgatang iti Bannawag.
Ngem iti naminsan a panagpagnapaganak iti maysa nga aldaw, a pangwatwatwatak, iti aglawlaw ti nagtaenganmi iti Siudad ti San Jose del Monte, diak napupuotan a nakadanonakon iti Tungkong Mangga iti panangunorko iti Quirino Highway. Nataldiapak ti maysa a puesto iti igid ti kalsada, iti maysa bakante a lote, nga adda laklakona a pagiwarnak ken magasin. Adda nakitak a nakasab-it a Liwayway. Naseggedan ti riknak nga agimtuod bareng adda ‘tay kasinginna a Bannawag.
TURISMO: Intayon Idiay Ayuyang Garden iti Pila, Siudad ti Laoag!
Adda, insungbat ti baket nga aglaklako. Kassangpet kano laeng ket dina pay gayam a naisab-it. Gimmatangak a dagus. Di masbaalan ti ragsakko a makabasa manen iti Bannawag. Kasla agbagtitakon ta a binisbisitok payen ti magasin. Inamadko no kaano pay nga aglaklako ‘diay baket ket kunana a nabayagen. Nakasarakak met laengen iti asideg a paggatangak. Impaunay-unayko kenkuana nga ibatiannak nga ibatian iti kopia tunggal sumangpet ti baro a Bannawag.
Ngem daydi a rag-o mariknak tunggal adda magatangko a kabarbaro a Bannawag iti nasarakak nga asideg a pagtagilakuan, kellaat a nasebseban. Iti maysa nga agsapa nga ipapanko iti puesto ti baket, anian a leddaangko ta nakadaldalus metten ti disso. Narakraken ti pagtagilakuan ken dadduma pay puesto a kaabayna. Nalabit, pinapanaw idan ti akinkukua iti lote ta patakderandan kadagiti pasdek. Kaslaak man nagminatay. Di masbaalan ti lidayko.
Ngem gapu iti napasgedan manen nga ayatko iti Bannawag, inkagumaak ti nagsukisok. Diak itan itulok a maisardeng ti pannakabasak iti Bannawag. Inyad-adayokon ti nagsapul iti pakagatangak. Agingga a nasarakak iti SM Fairview ken Ayala Fairview Terraces. Adda sanga ti National Book Store kadagitoy a mall ket adda lako ti NBS a Bannawag. Naammuak pay iti maysa a pagayam nga adda pay magatang iti Ever Gotesco Commonwealth.
Napateg la unay ti Bannawag kaniak ta makabasaak manen kalpasan ti naunday a panawen a diak nakaigggem gapu kadagiti adu a bambanag a nakatubeng. Kunaek man nga adda talugading daytoy a magasin tapno ipamuspusan a biroken ti maysa a mangipatpateg.
Diak ininggaan ti nagbirok iti pakagatangak. Tapno ngata masigurado nga adda latta magatangko iti uray sadino ken saanakon nga “agliday” no bigla manen nga agpukaw ti paggatgatangak, tunggal rummuarak, isamirak ti agkitakita kadagiti puesto ti aglaklako iti magmagasin. Adda nasarakak idiay Quiapo, ngem no mapanak, mairana met a naibusen ti lakoda a kopia. Adda pay nasarakak iti asideg ti Welcome Rotonda iti Quezon City.
Adun dagiti papanak paggatangan. Naragsakanak ta saankon a maliawatan ti maaddaan iti kopia.Uray kasano ti kaadayona, danonek ti patpatgek a Bannawag.
Ngem idi dimteng ket nagraira ti pandemia, naglidayak manen ta nagpukaw metten dagiti “paspasmokko” a paggatangan. Idi kakaro ti COVID ken lockdowns, naisardeng biit ti iruruar ti Bannawag. Ngem rimmuar met laeng ket mamindua laengen iti makabulan ti kaaddana. Isu metten ti nakapanunotak a mismon nga idiay Manila Bulletin idiay Intramuros ti innak gumatangan. Ay, ket idi napanak, ginatangko aminen a napalabas a kopia a diak nabasbasa tapno mapagsasarunok met laeng dagiti awan a bilang ti koleksionko. Manipud idin, sadiayen ti innak pagtartarusan a gumatangan. Am-ammodak payen dagiti guardia ti Manila Bulletin ta sumungadak pay laeng iti ruangan, “Bannawag, sir!” kunadan.
Iti kabayagko metten nga agbasbasa iti Bannawag, simken met ti riknak a pumadas nga agikur-it. Adda dagiti impatpatulodko a saritak ngem awan pay met ti nagasat a nakaruar iti pagrukodan dagiti mangiturturong. Agpatinggaak la ngatan a parabasa, kunkunak iti nakemko. Naimbag ‘tay ka-alumnus-ko iti sekondaria ta addan pakaidayawan a sarsaritana. Ni Marcelino Dumlao Santos daytoy. Saan a nakadidillaw ta nasirib ni Marcelino. Ngem ketdi, padasek latta ti agikur-it. Addanto latta met gundawayko a makaipablaak iti sinuratko iti patpatgek a magasin. Saan a dakes ti agarapaap.
Kabayatanna, agbasaak latta iti Bannawag. Ken gapu iti ayatko a marikna met ti dadduma ti ragsak nga ipapaay ti pannakabasa kadagiti linaon ti Bannawag, impabpabus-oyko dagiti nabasakon a kopia. Ti la nakaladingitak, naduktalak a pinagar-aron, pinagbilbilot iti tabako, ken no ania la ditan ti nangus-usaran dagiti nagiparangkapak iti Bannawag. Isu nga ur-urnongek lattan dagiti magatgatangko a kopia. Napateg a gamengko dagitoy. Ken daytoy ti maysa a nangruna a puon ti ragsakko. –O
TI AUTOR: Agnaeden ken ti pamiliana iti San Manuel, City of San Jose del Monte, Bulacan. Retiradon iti nagtrabahuanna, iti Department of Agrarian Reform Central Office, Quezon City.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
