ITI ABRA: Memorial mass para ken ni Fr. Mike Brillantes, narambakan-Bannawag

NARAMBAKAN ti memorial mass para ken ni Fr. Michael “Fr. Mike” Brillantes iti okasion ti maika-40 nga anibersario ti kinapadina iti baro a Balay Pagkararagan iti Parokia ti Sta. Catalina de Alejandria iti Tayum, Abra idi Nobiembre 30, 2023. Indauluan ni Most Rev. Leopoldo C. Jaucian, SVD, DD, Obispo ti Diosesis ti Bangued ti memorial mass, ken binayabay ti walo a padi a pakairamanan ti parish priest ti Tayum a ni Rev. Fr. Samuel Baruela, ken da Rev. Fr. Ruben Valdez, parish priest ti San Quintin; Rev. Fr. Tony Ruyan, parish priest ti Bucay; Rev. Fr. Floro Bautista, rector ti St. Joseph Seminary; Rev. Fr. Noli Baroña ti SVD District House; ken Rev. Fr. Rene Amasi a batch mate ni Fr. Mike, a nagpaay a homilist iti nasao a misa. Iti homily ni Fr. Amasi, imbinglayna ti kapadasanna iti panagkadkaduada ken ni Fr. Mike ken dagiti galad daytoy a pakaadawan kadagiti ulidan iti biag: managparabur, napasnek nga agtrabaho, ken natibker ti pammatina ti Dios iti laksid ti nagduduma a pakasuotan.

Agpakannawan: Fr. Noli Baroña, Fr. Tony Ruyan, Fr. Rene Amasi, Dra. Zosie Cariño Gateb, Mrs. Celia B. Taeza, Rev. Bishop Leopoldo Jaucian, Fr. Ruben Valdez, Fr. Floro Bautista, ken Fr. Sam Baruela. *(Rinetrato ni Louis Princepierre Taeza)*

Dagiti kameng ti Men's Choir ken da Apo Obispo Jaucian, Fr. Baruela, ken retired principal Vicky Cariño Elfante.

Malagip a nabayag a naserbi ni Fr. Mike iti Diosesis ti Bangued sakbay a napan diay Amerika. Pimmusay idi Marso 2, 2023 gapu iti colon cancer. Inyebkas met ni Mrs. Celia Flor B. Taeza, inaudi a kabsat ni Fr. Mike, ti naimpusuan a panagyaman ti pamiliada kadagiti dimmar-ay, iti kabagianda a ni Dra. Zosie Cariño Gateb, ni ADTEMPCO CEO Engr. Irene Bringas, ken ti Holy Ghost School, dagiti kakailianda, ken bisbisita, kasta met iti Men’s Choir a nagkanta (ti su met laeng a choir nagkanta idi ti maordenan ni Fr. Mike, 40 a tawenen ti napalabas). (Alfredo E. Versoza)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.