Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-15 a Paset)
DI mamati iti nangngegna, arintarayen ni Ella a nagturong iti ruangan ti mini-farm. Kinamakam met da Mang Bianong, Dex ken Elmer.
“’Yanda?” sinaludsod ni Ella idi makastrekda.
Imbes a sumungbat, arintarayen ketdi ni Dex a napan iti ‘yan ti kabarbaro a kulongan iti malinongan dagiti saba iti akinlaud a sikigan ti farm. Inngatona ti tarpaulin ti politiko a tabing ti kulongan sa kinitana dagiti kaduana.
Immanges iti dakkel ni Ella ket in-inut a nalpay dagiti abaga. Ania koma ti kayat a sawen dagiti simkil a karaykay dagiti manok iti kulongan? Dina pay kinita dagiti kakaduana, nagbuelta ket tinurongnan ti ruangan ti mini-farm.
NOBELA: Apo Baboy Party-List (6)
Saan pay a mapnek iti nakitana, nagmasngaad ni Elmer iti sanguanan ti kulongan, linuktanna sa riniknana ti kilikili ti maysa kadagiti simkil a manok. Ket impapainayadna ti timmakder idi mariknana ti kasla nalnaawan a buli iti lamiisna a bagi ti manok a sinipsipatan ken indirdir-ida iti Sta. Ines.
“Malas…” dandani di simngaw ti boses ni Mang Bianong. “Naimbag ta saan nga iti gradas ti nangabakan ni patay.”
“Malas,” nakuna met ni Elmer. Kasano ngamin ket inkari ti buyer-na a taga-Project 8 ti three percent no maallukoyna ni Ella a mangilako kenkuana kadagiti manokna a nangabak iti 2-Cock Ulutan. Impanamnamana met a magatang daytoy dagiti manok. Iti panagkitana ngamin, baldadonto met laeng dagiti manok ni Ella no kas pagarigan makalasatda. Ti maysa, naputed ti urat wenno pennet ti tumengna sa nauyak ti sellangna. Ti maikadua, nalikba ti kanawan a payakna ta naubadan iti tadi ti puonna ken natudok iti puon ti tengngedna. Kunana iti buyer-na nga ilawlawagnanto ken ni Ella tapno ilako laengen ti balasang dagiti nangabak a manokna. Sabagay, kunam a grabe dagiti sugatda, ngem makigasanggasatak, kinuna ti buyer-na. Patanor ti Derriyab Farm, kunam man!
“Ano, talagang namatay ang mga manok mo?” impasabat ni Manang Mameng ken ni Ella idi makalaem ti balasangna.
“Oo, mommy. Sayang. Nagngina ti inggatangko,” insungbat ni Ella. Nagtarus iti sopa, intupakna ti patongna ket nagtapaya.
Imbes a makipagrikna, naayatan ketdi ni Manang Mameng. “Pagpampanunotam, anakko. Imbes ngamin a libro ti sanguem, manok met ken galiera. Ania, naabrotmo met la ti inggatangmo?” Nagtakder iti sanguanan ni Ella sa nagmuestra. “Kunam met a nangabakda!”
Nagngilangil ni Ella. “Lugi pa ako, mommy,” insungbatna. “Patuka, vitamins pa. Namnamaek a mapasublik amin iti maikadua a labanda…” Dandani di simngaw ti bosesna. Inyamlidna ti bukot ti dakulapna kadagiti matana.
Naggampor nga asi ken ragsak ti marikrikna ni Manang Mameng iti langa ni Ella. Ta asino met ngamin nga ina ti di mangrikna no makitana a naliday ti anakna? Ngem iti sabali a bangir, adda marikrikna ni Manang Mameng a kalbit ti ragsak. Ania, no daytoy ti pakaupayan ni Ella ket isardengnan ti agtaraken iti manok, nga agtungpal iti panangtallikudna iti pallot? Ket nakikatugaw iti balasangna, sinallabayna sa inilutna ti abaga daytoy.
“Ganyan talaga ang buhay, anak. Gulong ng palad, kunada ngarud. Minsan nasa ibaba, minsan nasa ibabaw. Awan koma met ti natay a manokmo no dika nagtaraken iti manok, di ba?” inyandingay ni Manang Mameng ken ni Ella.
Saan a naguni ni Ella. Ngem madamdama pay, timmakder, inyamlidna manen ti bukot ti dakulapna kadagiti matana ket tinurongna ti agdan. “Ayoko na!” sa kinunana.
Kunam pay, kasla nangngegna nga impalais ti nalamiis a pul-oy sardam ti kaay-ayoda idi a salaen ken ni Mang Bianong a balse no rabii ti koronasion iti piesta ti Buguey iti auditorium a tantan-awan ti monumento ni Rizal—ti mangin-indayon a Blue Danube ti Cabasag Orchestra. Ania ngarud, kasla mayal-allon met ni Manang Mameng a timmakder a nangdanon ken ni Sary nga aglablaba iti washing machine iti likud ti balayda.
“Mapanta makitienda, Sary!” kinuna ni Manang Mameng.
Nasdaaw ni Sary. “Namalengke kayo ni manong sa Balintawak kahapon, manang. Ania pay ti diyo nagatang, aya?” kinuna ti katulongan.
“Awan nagatangko a sabong ti karabasa, paltong ti utong, kumpitis, gagalipen a tarong, ken dadduma pay a naimas a dengdengen a masagpawan ‘ti tinuno a bangus. Magustuan la unay ni manongmo ti kasta a dinengdeng!” insungbat ni Manang Mameng. “Agalmusartayon ta mapantan,” indagdagna pay sa nagsubli iti komedor. Nadatnganna dita ni Mang Bianong a mangik-ikkat iti kalub dagiti naidasar a pamigatna iti lamisaan.
“Ania daydiay nangngegko?” inkidday ni Mang Bianong nga agrimrimat dagiti matana. Ah, nabayagen daydi naudi a panagdengdeng ni Manang Mameng kadagiti kasta a nateng a nasagpawan iti tinuno a dalag wenno paltat. No dadduma, tinuno nga ar-aro wenno gurami ti isagpawna. Ket anian nga irut ti turogda ken Manang Mameng no agdigosda kalpasan ti panangrabiida a pasakalye ti panaglaglagipda iti sardam. A, ngem awanen ti makitana a dalag ken netib a paltat iti Farmers Market iti Cubao ken iti tiendaan iti Balintawak. Nagpukaw metten dagiti ar-aro ken gurami kadagiti tiendaan idi nagaburan ken nagbalin a kabalbalayan dagiti nabatbati a lungog iti Pateros ken Taguig. Ket anian a gagarna a nagtuno iti ar-aro ken gurami nga ilado nga insangpet ni Elmer iti naminsan a panagbakasion daytoy idiay Allacapan.
“Wen, siak ti agluto iti pangaldaw, ‘tay naimas a pangaldaw!” inkidday ni Manang Mameng.
Ngem nakarikna ni Mang Bianong iti nakagangganas a giteb ken salemsem iti barukongna iti kinuna ni Manang Mameng. “Hep, hep, hep!” Nakabagbagas ti isemna a nangpara ken ni Manang Mameng. “Naim-imas ti kasta a dinengdeng iti rabii,” kinunana. “Nakalagipka man? Ania nga okasion?”
Tinangad ni Manang Mameng ti uluanan ti agdan. “Secret!” inyayugna a nakabagbagas ti isemna ken ni Mang Bianong. “Sige, inton rabii ngaruden. Ngem mapankamin makipalengke ken ni Sary.”
Naggiteb ken sinalemsem manen ti barukong ni Mang Bianong. Kasta unay ti rimat dagiti matana a nangperreng ken ni Manang Mameng. “Ngem awanen ti dalag ken netib a paltat,” impalagipna.
“Agsapulak iti bangus Bonoan, uray ta nataba ti boksitna,” insungbat ni Manang Mameng sa insarangna ti dakulapna ken ni Mang Bianong.
“Mabiit lang,” kinuna met ni Mang Bianong sa simrek kampay idi iti siledna. Nagtalangkiaw pay naminsan sa nagrukob. Inarikapna ti bassit a supot a plastik nga insuksokna iti tupi ti shorts-na a maong. Inuyosna ti nalukot nga urnongna ket nangilasin iti sangaribu a pisos. Inyawatna daytoy ken ni Manang Mameng. “Pakitiendam ngarud,” inkiddayna.
Iti kalapaw ni Dex, ginaw-at ni Elmer ti apagkissay nga empelait iti kabinet dagiti sili, patis, ken dadduma pay a rekado ket tinemplaanna ti kapena. Sinimsimanna sa nagsanapsap. “Sayang, sayang a talaga,” inwingiwingna idinto ta indissona ti tasana.
“Wen ngarud,” kinuna met ni Dex. Impatayna ti sikona iti tumengna sa nagtapaya.
“Agasem ti inggatang ni Ella kadagita a manok?” Inturongna ti panagkitana iti kulongan a ‘yan dagiti natay a baudda.
“Ammok a matayda isu a diak masayangan. No makalasatda man, baldadoda met laeng isu a nagsapulakon iti buyer.” Immanges iti dakkel ni Elmer. “Isu a masayanganak iti komisionko koma.”
“Wen, aya? Ta uray no makalasatda awan met la ti serbida no baldadodanton. Isuda pay a palpalamutek, diallo,” kinuna met ni Dex.
“Saan la a dayta,” insilpo ni Elmer. “Padaanam ti desision ni Ella gapu iti ipapatay dagita nakanginngina a manokna. Addan dagiti natay idi a nangabak a manokna, adda met dagiti natay a naabak ngem kasla awan aniamanna kenkuana. Sabali ita. Nangted iti dayaw kenkuana dagita a manok ket gapu ta agdadamo, riknaenna la ketdi ti pannakapukawna kadagita. Isu a padaanam ti desisionna.”
“Desision?”
“Wen, dudua laeng. No teksas, ad-adda nga umunget no masugatan. No kamanokan met, dakkel ti posibilidadna a tumaray uray kurgit laeng ti sugatna no dina mapatay a dagus ti kalabanna.”
Kinudkod ni Dex kti ulona. “Lawlawagan, a, yusot!”
Immigup ni Elmer iti kapena ket lalo a naggagar ni Dex. “Ania ti aramiden ni Ella? Uray no agdadamo a pallotero no kasla teksas, ad-adda a puminget ket agsapul kadagiti dekalidad a manok, uray pay no nangina. Ngem no nalukneng ti nakemna a kas iti kamanokan, maupayen daytoy ket sumardengen nga agbaud.”
Nagdanag ni Dex iti naudi nga imbaga ni Elmer. Nagsakuntip. “Kasanon no sumardengen ni Ella? Numona ta sagsagpaminsan a lumaban ni Sir Bianong,” kinunana ket nagduaanna a kinudkod dagiti sellangna. “Idi agpakadaak kadagiti gagayyem idiay probinsia, kinatkatawaandak idi bassit laeng a backpack ti nangikargaak iti pagsukatak agraman tallo a bripko ken dua a kamisetak. Ngem kunak met a kaslanto maleta ti balikbayan ti maletak no agbakasionak.”
“Saan a bale kaniak ta aw-awisennak nga agpermante a trainer-handler ti akinkukua iti Liwanag Farm dita Batangas. Ni Jong, nasaona naminsan kaniak a pagaw-awidenda idiay Banurbor ta awan pamigsa ni tatangna iti talon.”
“Kasanottan?” Saanen a nailinged ni Dex ti danagna ket nagduaanna manen a kinudkod dagiti sellangna.
Immisem ni Elmer. Nasuroken a dua a tawen nga am-ammona ni Dex ket ammona a kasapulan daytoy ti pammatibker no maipasango iti parikut. Kinapudnona, dayta ti nakaipuonan ti panagsinningedda, a nangtungpal iti isusurot ni Dex kenkuana iti Quezon City tapno agbirok iti sabali a pagtrabahuanna.
Sigud nga agtrabtrabaho ni Dex iti Jobal, maysa a beerhouse idiay Sanchez, nga ayuyang idi ni Elmer no dumayoda iti derby. Para kolekta iti nagawangan a botelia kadagiti lamisaan ken para innaw ti trabahona. Ti problemana, pasaray sangagasut a pisos laeng ti masueldona iti makabulan kalpasan a maikkat ti bayad ti mabuongna a lunglongan ken botelia, ken mapukaw a tenedor kasta met ti pagabangna iti cubicle a pagturturoganna iti VIP room. Baro met ketdi iti edadna a duapulo ket siam ngem ‘tay kunana, awan man la ti matda nga agkaratikit iti bolsana a mangsarabo, piman, iti mabati iti sumaruno a sueldoda.
No kasta met laeng, apay a dika pay la agtalon? kinuna idi ni Elmer. Allergic kano iti ladog ken pangromansa kano ti pammagina. Agbirokka iti sabali a pagtrabahuam, kinuna pay ni Elmer. Ngem maamak kano a mangpanaw iti agdama a trabahona amangan no awan ti mastrekanna. Ket idi inawis ni Elmer iti siudad tapno tulonganna nga agsapul iti pagtrabahuanna, pinanawannan ti Jobal a di nagpakada amangan no singirenda pay ti bayad dagiti nabuongna a lunglongan kalpasan ti naudi a panagsueldona. Ket inrekomenda ni Elmer iti maysa a pagsansanayanna iti manok—iti mini-farm ni Mang Bianong.
Ngem adda galad ni Dex a raemen unay ni Elmer—ti kinatured daytoy no maisangal iti gulo. No namin-anon a nasaksian ni Elmer ti kinatured daytoy a makiboksing kadagiti artek iti Jobal. Isu nga idi naammuan ni Elmer ti panangullaw ni Dex iti mannanakaw a nakastrek iti mini-farm, pulos a di nasdaaw. Kinablaawanna pay ketdi sa pinainumna iti empelait ken pinagpulotanna iti nakulbet a kudil ti baka.
“Ala, bay-am ta irekomendaka kadagiti dadduma pay nga am-ammok nga agmanmanok no kas pagarigan sumardengen da Mang Bianong ken Ella nga agtaraken iti para pallot,” kinuna met laeng ni Elmer idi madlawna ti danag iti rupa ni Dex.
Iti balayda, nakaruaren iti ruangan da Manang Mameng ken Sary a mapan makitienda, ngem nagsubli ni Manang Mameng. Inipigna ni Mang Bianong ket nakabagbagas ti isemna a nangtangad iti uluanan ti agdan.
“Paliiwem man ‘ta anakmo,” arig arasaas ti timekna.
“Apay?” Tinangad met ni Mang Bianong ti nakarikep a ridaw ti kuarto ni Ella iti uluanan ti agdan.
“Basta!” kinuna ni Manang Mameng ket kinamakamnan ni Sary.
Ngem nakasangpeten da Manang Mameng a napan nakitienda, di pay immulog ni Ella.
“Kayatmo a sawen, di pay namigat?” sinaludsod ni Manang Mameng ken ni Mang Bianong.
Nagngilangil ni Mang Bianong. “Sampay. Nasakit sa met la unayen ti nakemna iti pannakatay dagiti manokna. Sabagay, natural laeng ta dakkel a dayaw ti intedda kenkuana. Agasem, inlaklakayko ti makipalpallot ngem awan man la ti uray maysa la koma a pammadayaw a nagun-odko!” Nagkatawa ni Mang Bianong.
“Ania a pammadayaw ti ur-urayem?” immusiig ni Manang Mameng. “Panangay-ay, kunam, a!”
“Apay?”
“Kasano, ‘ta sangapulo nga ilabanmo, nasayaaten no adda tallo a mangabak! Ti kunam, diak madmadlaw? Nangabakak, kunkunam no kua. Gumatangka pay iti padaw wenno litson a pasarabom. Ngem awan metten ti manokmo no agawidka. Sumangkaulbod met dagita ubbingmo ta kunada ketdin nga impadawatmo ti manokyo ta impatayna ti sugatna. Ania, pati inabakyo a manok, impadawatyo pay? Dayta a rawetda nga agpulotan, kaykayatda ti gumatang iti sangaplatito a mani ngem ti adobuenda ti abakenyo a manok?”
Napitpit ti isem ni Mang Bianong. “Baka maupayen ‘ta balasangmo,” pinangyaw-awan ni Mang Bianong.
“Sapay koma!” inyallawat ni Manang Mameng. “Sika ket koma ti umuna tapno adda tuladenna! Agpabunarak pay no kua, a! Isu man met nga uray sangatimban ti nalunag a kandela nga itugtugkelko dita altar, itultuloyko latta ta mamatiak nga agbunganto iti imbag dagiti idatdatonko iti altar!”
Lalo a napitpit ti isem ni Mang Bianong. Saanen a nagtimek ta ammona nga ad-adu pay ti mangngegna no agsao pay. Haan a bale, ti paboritona a dinengdeng ti pangmalemda. Kaano pay daydi naudi?
“MAKADUNGSAAKON,” kinuna ni Mang Bianong. Timmakder, nakalawlawa kampay idi ti suyaabna a nangkudkod iti kanigid a kilikilina. Kinitana ti relo iti dibision iti ngatuen ti telebision. Agalas nueben. Naulimeken ti aglawlaw. “Buyaem kadi amin dagiti programam?”
“Maysa laengen,” insungbat ni Manang Mameng a dina man la insina ti panagkitana iti telebision.
“Nadagaang. Mag-shower muna ako,” kinuna manen ni Mang Bianong sa pinarukibanna ni Manang Mameng.
“Sige,” aleng-aleng latta nga insungbat ni Manang Mameng.
Ne, apay ngata? nakuna ni Mang Bianong iti unegna. Nalipatanna kadin a ti paboritomi a dinengdeng ti pinangrabiimi?
Nupay kasta, saan a naksayan ti ganaygay ni Mang Bianong a nagturong iti banio.
Ket idi bisibisan ti shower iti kasla naipaanem-em nga arbis ti sabon iti bagina, ket in-inut a nagungar ti nakagangganas a giteb ken salemsem iti luy-ongna, isu pay la ti pannakapanunotna a talaga a nabayagen daydi naudi a panangduayya ti dinengdeng a nasagpawan iti tinuno a dalag kadakuada ken Manang Mameng.
Agdaydayyeng, kinuso ni Mang Bianong ti buokna iti tualia. Kalpasanna, imbidangna ti tualiana sa rimmuar iti banio.
Awanen ni Manang Mameng iti sango ti telebision. Iniddep ni Mang Bianong ti bombilia iti salas sa agtiltil-ay nga immasideg iti nakarikep a ridaw ti kuartoda. Pumigpigsa ti giteb ti barukongna, indennesna ti kanigid a lapayagna iti rikep. Nakaul-ulimek? Nagiddan ni Mameng, naisip ni Mang Bianong. Nagaruat iti derosas a nightie ket gimmanus iti sangapulo a tawen iti limapulo ket lima nga edadna iti lawag ti lumabaga a bombilia ti altar ti siledda? O, boy!
Pinagrisiris ni Mang Bianong dagiti dakulapna. Aglabbeten ti salemsem iti barukongna. Siaannad a nangpuligos iti seradura sa inan-anatna nga induron ti rikep. Ket immawer ti salemsem iti barukongna iti naipasabat kenkuana a buya. Nakadaster iti sabongan iti nalabaga ni Manang Mameng a nakatugaw iti iking ti katreda, agtantanamitim nga agpirpirit iti rosario, kumitkita iti altar ti siled a pagkirkirayan ti sindi ti kasla ramay a kandela a naitugkel iti platito.
Naisardeng ni Manang Mameng ti panagrosariona iti panaglukat ti ridaw. Ket nagtimbukel dagiti matana idinto ta naibbatanna ti rosariona iti nakitana a langa ti asawana.
“Bian, ano ka ba? Apay a kasta ti langam?” Pinidut ni Manang Mameng ti rosariona. Kasano ngamin ket kasla nalalatan a tukak ni Mang Bianong iti adun nga imresanna a kakuykuyog ti yaasidegna iti innem a pulo ket lima a tawenna.
“I’m in love and you’re in love too that’s why, di ba? Di ngamin no agdengdengka idi iti sabong ti karabasa, paltong ti utong, kumpitis, tarong, ken kabatiti a bilidan a masagpawan iti tinuno a dalag ket kua…” Kiniddayan ni Mang Bianong ni Manang Mameng sa nakikatugaw. Sinallabayna ti asawana sa binisongna ti pingping daytoy. “Nabangloka pay laeng, inada!”
Agkatkatawa ni Manang Mameng a nangiwalin iti asawana sa dinanogna kampay idi ti luppo daytoy. “’Naknakanmo, aya? Dika la maalas! Laklakayankan!”
“Alla, ket no mabalin pay met. Alan, da!”
Imlek ni Manang Mameng. “Sika, Bibiano, wen!” Kinuddotna kampay idi ti luy-ong ni Mang Bianong. Ania pay, bimtak la ket ngarud ti garakgakna. “Ay, matmaturog a dalag!”
“Mamurmurayanto, a! Aniat’ serbi ti dinengdengmo!”
“Dinengdeng?” inyayug ni Manang Mameng. Adda naggilap iti mugingna ket ad-addan ti katawana. “Ay, Bibiano, aya! Blowout-ko daydiay. Ayoko na, kuna ngamin ‘diay anakmo itay umuli kalpasan a natay dagiti manokna. Madin a makipallot!”
“Sinalbag!” Nakasugsugpet ti isem ni Mang Bianong. “Ngem mabalinta met ti ag-side trip, inada!”
“Ay, di mabalin, amada! Off line!” inrabak met ni Manang Mameng nga agrimrimat dagiti matana.
Ania pay, inawid ni Mang Bianong ni Manang Mameng. Ngem nagsaretset ti kandela iti altar sa nagkuridemdem.
“Baka agiddep,” kinuna ni Manang Mameng a kumitkita iti kandela. "Daanen dayta. Naibus gayamen ti ginatangko idi naminsan a Domingo."
“Hmmm, ba’am lattan,” kinuna ketdi ni Mang Bianong ket immunan a nagilad.
Ngem apagilad ni Manang Mameng, nagsaretset manen ti kandela sa nagkuridemdem. Isu pay la ti pannakadlaw ni Mang Bianong a saan nga aglua ti kandela
Bimmangon ni Manang Mameng. “Siwangak iti pagayusan ti luana,” kinunana.
Ngem inggawid ni Mang Bianong. ‘”Mayka kad ketdin,” inyarasaasna. “Nalaklaka a marunot no narayray unay ta nabulos ti agtedted a luana.”
Saanen a nagkedked ni Manang Mameng idi guyoden ni Mang Bianong iti atagna.
MAIKANEMEN iti agsapa. Manipud iti salas a pangpalpalabsanna iti rasionna a pagiwarnak bayat ti panagkapena, nakagangganas ti panagdengngegna iti panagsisinnungbat ti taraok dagiti manokda iti mini-farm iti abagatanen ti balayda. Iti sikigan ti balayda a dumna iti Ayungin Street, idaydayyeng ni Manang Mameng ti Blue Danube bayat ti panagpasuyotna iti pagpasabong kadagiti orkidiana.
Apagisu a maibus ni Mang Bianong ti kapena idi ipakaammo ni Sary a naisagananan ti pamigatda. Indissona ti pagiwarnak ket tinan-awanna ni Manang Mameng.
“’Maykan. Nakaluton ni Sary,” kinuna ni Mang Bianong.
“Mabiit laeng. Bimmaban ni Ella?” kinuna met ni Manang Mameng sa intuloyna nga indayyeng ti Blue Danube.
Tinangad ni Mang Bianong ti nakatangep pay laeng a ridaw ti siled ni Ella iti uluanan ti agdan. “Saan pay,” insungbatna.
“Sana tuloy-tuloy na,” intungtung-ed ni Manang Mameng. “Tallikudanna ngatan nga agpayso ti pannakigalierana? Dati, nabisitanan dagiti manokna iti kastoy nga oras. Ayabamon ta aggigiddantayo. Di pay nangmalem.”
Tinurong ni Mang Bianong ti agdan. Ngem maikapat laeng a tukad, nagpug-awen ni Mang Bianong. Nagtalangkiaw sa pinispiselna dagiti tumengna. Nangrikna idi rabii? Sus, grabe, insupiat ti unegna. Ngem kaskasdi a nakarikna iti bain. Agasem ngamin, no marathon koma, pinagnana laengen ti maudi a duapulo a metro ti one hundred meter dash a tarayenna. Ngem at least, naidanonna iti finish line ti kasla mapulsot nga angesna!
Inkeddeng ni Mang Bianong a saanen nga umuli. Inawaganna iti namitlo ni Ella ket impapainayadnan ti nagsubli. Isu met a lumaem ni Manang Mameng.
Nairuamen dagiti agassawa a manmano a makagiddanda a mangan ti balasangda. Isu nga idi dida mauray nga umulog ni Ella, simmangodan iti panganan. Ngem saggatloda pay la a subo, nakangngegda iti palakapak iti agdan. Ni gayam Ella nga agdardaras nga umulog.
“’Lika na!” inyayab ni Manang Mameng. “Kumusta ang magandang baby ko?” inyayugna.
Ngem kasla awan nangngeg ni Ella. Nagtarus daytoy iti ridaw, sa iti ruangan. Kimmita iti Karpa Street, sa idi kuan inlayonna ti rimmuar. Idi makadanon iti nagsulian, kimmita iti ungto ti Ayungin Street iti laud.
Iti komedor, nagkinnita da Mang Bianong ken Manang Mameng. Sintimek, timmakder ni Mang Bianong ket naglayon iti ruangan. Isu met nga agsubli ni Ella.
“Apay?” sinaludsod ni Mang Bianong iti balasangna.
“May magandang balita, dad!” kinuna ni Ella a kasta unay ti raniag ti rupana, kasungani unay iti napalabas nga agsapa a kasla narba a kasuoran ti rupa ti balasang.
“Anong magandang balita?”
“Maammuam no madamdama, dad!” insungbat ni Ella ket naglayon iti komedor. “Good morning, mom!” inkablaawna ket kasla mailiw unay a nangarakup ken nangbisong iti inana.
“Good morning, baby ko!” insubalit met ni Manang Mameng. “Addan sa ket nangparagsak iti anakko a bigbigat?” Nangtempla iti kape ti balasangna.
Nagkatawa laeng ni Ella. Inyasideg ti inana ti tray ti tinapay ken prito nga itlog, ngem nagkiet a nagmusiig idinto ta timmimtim iti kapena.
“Dika nangrabii, dika manen mamigat?” impalagip ni Manang Mameng.
Ngem nagduadua ni Mang Bianong iti tignay ti balasangna. No kuan agallingag, no kuan taliawenna ti ruangan.
Madamdama pay, naguni ti selpon iti bolsa ti shorts ni Ella. Timmakder a dagus ti balasang. Kinautna ti selpon iti bolsana sa arintarayen a nagturong iti ridaw.
“Oo, malapit na kayo. Nasa dulo ng Karpa Street ang bahay namin!”
Nagkinnita dagiti agassawa sa dandani naggiddanda a timmakder. Isu met a sumardeng ti maysa a lumabaga a van iti sango ti ruangan. Linuktan ti Ella ti ruangan.
Kunakto pay, nakuna ni Mang Bianong iti nakemna idi makitana ti logo iti bakrang ti van. Asino ngamin a mammallot ti di makaam-ammo iti logo ni Bibong Ariana, ti nalatak nga akinkukua iti King Ariana Farm? Patanorna ti kaaduan nga entry a no namin-anon a nagkampeon iti international derby iti Araneta Coliseum. Ngem maiduma kadagiti padana a dakkel ti farm-na, agpatanor-aglako laeng, saan a makipalpallot.
Madamdama pay, dimsaag iti van ti maysa a guapo nga agtutubo a nagaruat iti kumepkep a pantalon a maong a pinarisanna iti puraw a sando a para basketbol.
“Miss Ella?” Umis-isem ti agtutubo nga immasideg ken ni Ella.
“Oo. Ako nga!” Inawat ni Ella ti kanawan a dakulap ti agtutubo.
“Leony po! Good morning po!” Winagwag ti agtutubo ti dakulap ni Ella. Ako ang inutusan ni Boss Bibong na magdala ng manok. Panlaban na.”
Immanges iti dakkel ni Mang Bianong. No kasta, nagpupok ni Ella iti siledna ket awan ti inaramidna no di kinontakna dagiti bigtime a farm a nakitana iti Internet? Ket ti King Ariana ti napilina. Kunak man no madin a makipallot daytoy nga ubing, nakunana laengen idi inawis ni Ella ti agtutubo a nagbitbit iti single a karton ti manok iti mini-farm. Isu met nga immasideg ni Manang Mameng.
“Ania, nagorder manen iti manok?” imbanang-es ni Manang Mameng idi makitana ti van ti King Ariana Farm a bulonna a timmallikud.
Ket saan lattan a nagtimtimek da Mang Bianong ken Ella idi nakamatisan a daing a munamon laeng ti kadua ti innapuy a pinangaldawda ken nakamatisan nga itlog a nalabaga ti pinangmalemda.
(Maituloyto)
Napalabas a paspaset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
