Mapan a 80 a probinsia ti mabalin nga apektaran ti El Niño agingga iti arinunos ti Abril, kinuna ti Task Force El Niño itay Abril 1.
Segun ken ni Joey Villarama a pannakangiwat ti Task Force El Niño, nadumaduma ti mabalin nga epekto ti El Niño phenomenon kadagiti probinsia.
Kinuna ni Villarama a wanwanawananda ti sumaruno a dua a bulan gapu ta panawen itan ti kalgaw, ket umadu ti agkasapulan iti danum.
Iti agdama, addan 16 nga ili a nangideklarar iti state of calamity, idinto nga addan iti state of calamity ti Occidental Mindoro.
TURISMO: Intayon Idiay Ayuyang Garden iti Pila, Siudad ti Laoag!
Naapektaran met ti Western Visayas (Rehion 6), idinto a nasuspende dagiti klase iti Iloilo ken Capiz itay Abril 1 ken 2 gapu iti nakaro a pudot ti tiempo.
Agkidkiddaw dagiti naapektaran a Local Government Unit (LGU) iti dadduma pay a pangalaan iti danum a kas iti bubon wenno irigasion.
Maibatay iti datos iti Marso 25, mapanen a PhP1.75 a bilion ti nadadael iti agrikultura, a katukad iti 32,231 nga ektaria a taltalon, ngem masalbar pay ti 79 a porsiento ti apit kadagitoy.
Sipsiputan ti Task Force El Niño dagiti naapektaran a rehion kas iti Rehion 1, 2, 3, 4A, 4B, 6, 9, and 12. (Raymund Antonio/Manila Bulletin//Lito Hilidon/Bannawag)
