Babaen ti Administrative Order (AO) No. 19 a nairuar idi Marso 25, binuangay ni Presidente Ferdinand Marcos, Jr. (PBBM) itay Abril 2 ti Inter-Agency Committee for Right-of Way (ROW) Activities para iti National Railway Projects (NRP).
Nabukel ti Komite tapno adalen ken sangalenna ti epektibo a wagas tapno mapapardas ti pannakagatang kadagiti daga a kasapulan dagiti proyekto ti gobierno iti babaen ti NRP.
Maysa kadagiti annongen ti Komite ti panakasangal ken panangipatungpal iti polisia, programa, ken proyekto mainaig iti panaggatang kadagiti daga, ken dadduma pay a serbisio a kas iti pagbiagan, panangisubli iti panguartaan, ken pagakaran dagiti maseknan.
Maibatay iti AO No. 19, ti Sekretario ti Department of Transportation (DOTr) ti madutokan a mangidaulo iti komite, ken agpaay a kas co-chairman ti daulo ti Department of Human Settlements and Urban Development (DHSUD).
Manipud Kadagiti Agdama a Kameng ti Bannawag: Dios ti Agngina!
Agpaay a kameng ti komite dagiti maseknan ng ahensia ti gobierno a kas iti Department of the Interior and Local Government (DILG); Department of Social Welfare and Development (DSWD); Department of Environment and Natural Resources (DENR); Department of Finance (DOF); Department of Budget and Management (DBM); Department of Justice (DOJ); ken ti Office of the Solicitor General (OSG).
Agpaay a kas Sekretario ti Philippine National Railway (PNR).
Ti Republic Act (RA) No. 10752 wenno ti “Right-of-Way (ROW) Act” ti mangted iti karbengan iti gobierno a manggatang iti daga a maaramat a kas ROW ti proyekto empraestruktura ti gobierno babaen ti donasion, napagnumuan a pannakailako, panangsamsam (expropration), ken dadduma pay a wagas ti pananggun-od iti daga.
Ti Metro Manila Subway Project, North-South Commuter Railway System, Mindanao Railway Project, ken PNR South Long Haul ti sumagmamano kadagiti kangrunaan a proyekto ti administrasion ni PBBM iti sektor ti transportasion. (Betheena Unite/Manila Bulletin//Lito Hilidon/Bannawag)
