Impaulog ti Davao City Regional Trial Court (RTC) ti pannakatiliw ni Kingdom of Jesus Christ (KOJC) Founder Apollo C. Quiboloy itay Abril 1.
Segun iti pangngeddeng ni Presiding Judge Dante A. Baguio ti Davao City RTC Branch 12, impaulogna ti warrant of arrest idi Marso 14 maibusor ken ni Quiboloy ta natakuatanna nga adda "probable cause" iti kaso ti pastor.
Naidarum ni Quiboloy gapu iti panaglabsingna iti Section 10(a) ken 5(b) ti Republic Act (RA) No. 7610 wenno ti Special Protection of Children Against Abuse, Exploitation and Discrimination Act, gapu iti alegasion ti seksual a panangabuso iti menor de edad idi 2011.
Nairaman iti kaso da Jackiely W. Roy, Cresente Canada, Paulene Canada, Ingrid C. Canada, ken Sylvia Camanes.
Manipud Kadagiti Agdama a Kameng ti Bannawag: Dios ti Agngina!
Ngem kinuna ni Baguio a nangipila iti mosion dagiti abogado ni Quiboloy tapno maitantan ti pannakatiliw ni Quiboloy idinto nga adda impilada a "motion for consideration" iti Department of Justice (DOJ).
Kinuna ni Baguio a pinatganna ti mosion dagiti abogado ni Quiboloy bayat ti panagurayda iti pannakaresolba ti motion for reconsideration iti DOJ.
Ngem ita, kinuna ti korte a napalabasen ti nainkalintegan a tiempo, ket awan pay ti naawat daytoy a resolusion mainaig iti nadakamat a motion for reconsideration, saanen a rumbeng nga aguray ti korte, ket nasken a maipatungpal ti warrant of arrest a naipaulogen idi.
Innayon pay ti korte a sipapanunot daytoy iti kalintegan dagiti agsinnumbangir a partido kas iti napartak a pannakabista ti kaso a nasken nga ipatungpal ti korte. (Jeffrey Damicog/Manila Bulletin//Lito Hilidon/Bannawag)
