Nagraranget dagiti soldado ti 50th Infantry Battalion (IB) ti Philippine Army (PA) ken maysa a grupo ti New People’s Army (NPA) iti Barangay Nagcanasan iti Pilar, Abra itay Abril 2.
Gapu itoy nasuspende dagiti klase iti Pilar, Abra itay Abril 3, idinto a nakanselar ti 2nd Balicucha Festival ti Santa Maria, Ilocos Sur.
Itay Abril 2, nangisayangkat ti 50th IB iti security operation iti nagbedngan ti Barangay Nagcanasan (Pilar) ken ti Barangay Babal-Lasioan (Santa Maria) a nakasaganganda kadagiti kameng ti NPA-North Abra Guerilla Field Committee (KLG-North Abra) nga adda iti babaen ti Ilocos Cordillera Regional Committee (ICRC) nga idauluan ti maysa a Maria Luisa Purcray a tubo ti Mindanao.
Dagitoy a grupo ti aglemlemmeng iti nagbedngan ti Abra-Kalinga-Apayao.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni Army Major Bryan Albano a daulo ti 50th IB, nangrugi ti engkuentro iti 11:50 iti bigat, sa sinaruno dagiti airstrike.
Kinuna ni Pilar Mayor Christopher Beroña a naibakuiten iti gymnasium ti ili dagiti agnanaed iti asideg ti pagbabakalan.
Kinuna ni Major Gen. Audrey L. Pasia, Commander ti 5th Infantry Division, daytoyen ti maikalima a panangsarangetda kadagiti NPA iti Abra iti daytoy a tawen.
Iti sabali a bangir, indagadag ni Brig. Gen. Ferdinand Melchor dela Cruz, Commander ti 501st Infrantry Brigade, ti isusuko dagiti kameng ti NPA maipagapu man laeng iti talna ken irarang-ay ti ili. (Freddie Lazaro/Manila Bulletin//Lito Hilidon/Bannawag)
