Dinayyeg ti 7.4 magnitude a ginggined ti Taiwan itay Abril 3, a nangrippuog kadagiti adu a pasdek ken nangparnuay iti tsunami a dimmanon iti umabagatan nga isla ti Japan.
Nagtaud ti dayyeg iti 18 a kilometro iti abagatan-laud nga abagatan ti Hualien ket adda iti kauneg a 35 kilometro itay 7:58 iti agsapa.
Dakkel ti naperdi iti lima a kadsaaran a pasdek iti Hualien, idinto a nagtinnag dagiti baldosa kadagiti naapektaran a pasdek iti kabesera a Taipei.
Naisardeng pay laeng ti biahe ti tren ken subway iti entero nga isla ti Taipei, ngem nagsubli met laeng a dagus iti normal ti situasion.
TURISMO: Intayon Idiay Ayuyang Garden iti Pila, Siudad ti Laoag!
Imballaag ti Japan Meteorological Agency (JAMA) ti itatanur ti tsunami nga agingga 3-metro (9.8 pie) ti kangatona iti abagatan ti isla ti Okinawa, Japan.
Nadlaw ti JAMA ti 30 sentimetro (agarup 1 pie) ti kangatona a dalluyon iti aplaya ti Yonaguni Island, 15 a minuto kalpasan ti ginggined.
Segun iti Pacific Tsunami Warning Center, awan ti pangta ti tsunami iti Hawaii wenno iti Guam.
Ngem nagballaag ti Philippine Institute of Volcanology and Seismology (Phivolcs) iti mabalin a mapataud a tsunami kadagiti probinsia ti Batanes, Cagayan, Ilocos Norte, ken Isabela.
Daytoy a ginggined ti kapigsaan iti Taiwan sipud iti ginggined idi 1999. (Associated Press/Manila Bulletin//Lito Hilidon/Bannawag)
