Al-alawen dagiti kameng ti search and rescue team dagiti napupok wenno nalakon kadagiti nadadael a pasdek a gapuanan ti napigsa a ginggined a nangdayyeg iti Taiwan itay Abril 3.

Nanggudas iti biag ti siam a tao, idinto a 1,000 ti dinangran ti ginggined a nangdayyeg iti Taiwan itay Abril 3, 2024 segun iti Taiwan Fire Agency.

Segun iti Central News Agency, kaaduan kadagiti natay ti natinnagan kadagiti bato, uppat ti nadangran iti Taroko National Park, ken maysa ti natay iti uneg ti nadadael a pasdek.

Iti Hualien, naiwaras dagiti mangalaw kadagiti mapukpukaw, napupok wenno nalakon kadagiti nadadael a pasdek.

Saan pay a masinunuo ita no mano ti balor ti naperdi gapu iti ginggined.

Tawen 2018 ti naudi a pannakadayyeg ti Hualien a nangkeltay iti biag ti 17 a tao. Ngem idi Septiembre 21, 1999 nadayyeg ti 7.7 magnitude ti Taiwan, a nakatayan ti 2,400 a tao, idinto a 100,000 ti nadangran, ken rinibu a pasdek ti narpuog. (Associated Press/Manila Bulletin//Lito Hilidon/Bannawag)