Impabuya ti Tres Tarappaits ti Bukanegan iti CCP (Cultural Center of the Philippines) Kanto Kultura Baraptasan 2024 a naangay iti Rizal Park Open Auditorium iti Siudad ti Manila kas pangrambak iti Bulan ti Literatura itay Abril 6.
Nadakamat iti Bukanegan ti saludsod nga "Ania ti kaykayatmo: lakay a masirib a nabaknang wenno baro a naguapo a mabalin nga iturongturong?"
Ni Estella B. Guerrero ti nangibagi iti biang ti lakay a masirib a nabaknang, idinto nga imbagian ni Leilanie G. Adriano ti biang ti baro a naguapo (a mabalin nga iturongturong). Nagpaay met a Mangibabaet (Lakandiwa) ni Aileen R. Rambaud.
Nabukel ti Tres Tarappaits a grupo dagiti Ilokana a mannaniw idi 2009 iti babaen ti programa a "Daniw ken Basi" nga insayangkat ti GUMIL Filipinas (Gunglo dagiti Mannurat nga Ilokano iti Filipinas ken Ballasiw-taaw) tapno maitandudo ti panagdaniw, agraman ti bukanegan (manipud iti Bucaneg) kas pammigbig ken ni Pedro Bucaneg nga am-ammo a kas Ama ti Literatura Ilokana.
TURISMO: Intayon Idiay Ayuyang Garden iti Pila, Siudad ti Laoag!
Nagpaay met ni Faye F. Meligrito a kas coordinator ti CCP ken GUMIL Filipinas.
Mabuya ti video ti Bukanegan ti Tres Tarappaits ditoy: https://www.facebook.com/1309938995/videos/442759561616011/. (Lito Hilidon/Bannawag)
