Impaulog ti Pasig City Regional Trial Court (RTC) itay Abril 11, 2024 ti arrest order maibusor ken ni Kingdom of Jesus Christ (KOJC) founder Pastor Apollo C. Quiboloy gapu iti di mapiansaan a kaso a qualified human trafficking.
Nairaman iti arrest order dagiti naidarum iti isu met laeng a kaso a da Jackielyn W. Roy, Cresente Canada, Paulene Canada, Ingrid C. Canada, ken Sylvia Cemañes.
Saan a pinatgan ni Pasig City RTC Branch 159 Acting Presiding Judge Rainelda H. Estacio-Montesa ti mosion nga impila dagiti abogado ni Quiboloy a nangkiddaw a maitantan ti pannakabista ti kaso ken ti pannakaipaulog ti warrant of arrest gapu ta adda impilada a motion for reconsideration iti Department of Justice (DOJ) tapno mabalusingsing ti pannakaipila ti kaso iti korte.
Maibatay iti pangngeddeng ni Judge Montesa, saan a rumbeng a maitantan ti pannakairuar iti warrant of arrest ken ti pannakabista ti kaso maigapu laeng iti naipila a motion for reconsideration iti DOJ, ta awan daytoy a pagalagadan iti Section 11, Rule 116 ti Rules on Criminal Procedure.
Manipud Kadagiti Agdama a Kameng ti Bannawag: Dios ti Agngina!
Segun ken ni Judge Montesa, maiparit ti motion to defer/suspend proceedings and hold in abeyance issuance of warrant of arrest nga indatag dagiti abogado ni Quiboloy isu a dina pinatgan daytoy.
Kinuna ni Judge Montesa a kalpasan ti panangadal ken panangtingitingna kadagiti impormasion ken ebidensia, natakuatan nga adda probable cause iti naipila a kaso a panangsalungasing iti Section 4(a) of Republic Act No. 9208, wenno ti Anti-Trafficking in Persons Act of 2003, ket maiparbeng ti warrant of arrest. (Jeffrey Damicog/Manila Bulletin//Lito Hilidon/Bannawag)
