Impaulog ni Presidente Ferdinand R. Marcos Jr. (PBBM) itay Marso 25 ti Administrative Order (AO) No. 18 a mangipagel kadagiti opisial ken empleado ti gobierno nga agusar iti sirena, blinker, ken dadduma pay nga aggilapgilap a silsilaw a maawagan iti wangwang, a makasinga iti trapiko ken mamagpeggad iti kalsada.
Iti AO No. 18 a nairuar itay Abril 11, maiparit kadagiti opisial ken kameng ti gobierno ti panagusar kadagiti wangwang a mangpataud iti napigsa nga uni, agraman dome light, blinker, ken aggilapgilap a silsilaw tapno agtalinaed a natalged ti kalsada.
Mailaksid iti AO No. 18 dagiti lugan ti Armed Forces of the Philippines (AFP), ti National Bureau of Investigation (NBI), ti Philippine National Police (PNP), trak ti bombero, ambulansia, ken dadduma pay a lugan a para-emerhensia.
Dinutokan ti Presidente ti Department of Transportation (DOTr) ken dagiti maseknan nga ahensia ti gobierno, a mangrebisar, mangadal, ken mangpabaro kadagiti agdama a polisia ti gobierno tapno maipatungpal ti naipaulog nga AO.
TURISMO: Intayon Idiay Ayuyang Garden iti Pila, Siudad ti Laoag!
Pinalagipan ni PBBM dagiti opisial ken empleado ti gobierno a ti panagkamengda iti gobierno ket saan a mangted kadakuada iti kalintegan a mangsalungasing iti linteg-trapiko. (Argyll Cyrus Geducos/Manila Bulletin//Lito Hilidon/Bannawag)
