Addan iti Washington, D.C., Estados Unidos (US) ni President Ferdinand R. Marcos Jr. para iti umuna a US-Japan-Philippines Trilateral Leaders Summit.
Nagdisso ti eroplano a nagluganan ni Presidente Marcos ken ti delegasion ti Filipinas iti Joint Base Andrews iti Maryland itay Mierkoles iti rabii (oras iti US), segun ken ni Communications Secretary Cheloy Garafil.
Sinabet ida dagiti opisial ti gobierno ti US ken ti Embahada ti Filipinas iti Washington, a pakairamanan da US Ambassador to the Philippines MaryKay Carlson; US Air Force’s 89 Operations Group Commander Col. Gregory Adams; US Deputy Chief of Protocol Sharon Weber; US Defense Assistant Secretary Eli Ratner; Philippine Ambassador to the US Jose Manuel Romualdez; Philippine Defense Attache to the US, Navy Commodore Salvador Henry Quinto; ken ni Philippine Police Attache to the US Brig. Gen. Wilson Joseph Lopez.
Kasarita ni Presidente Marcos da US President Joe Biden ken Japanese Prime Minister Fumio Kishida maipapan iti nadumaduma a pakaseknanda iti rehion, agraman ti panagturay ti linteg ken maibasar-linteg a kinaurnos iti Indo-Pasipiko a rehion.
Manipud Kadagiti Agdama a Kameng ti Bannawag: Dios ti Agngina!
Manamnama met ti bilateral meeting da Presidente Marcos ken US President Biden maipapan iti panangpatibker ti panagkadua ti Filipinas ken US.
Sakbay daytoy, inkari ni Presidente Marcos a patalgedanna ti pannakiandingay ti US ken Japan, nangruna iti tay-ak ti empraestruktura, semiconductor, cybersecurity, enerhia, ken panangdepensa ken seguridad iti taaw. (Ruth Abbey Gita-Carlos/PNA//Lito Hilidon/Bannawag)
