TAO, LUGAR, PASAMAK: Sadiay Batac-Bannawag

PRESKO A NATENG para kadagiti empleado agraman dagiti estudiante iti Mariano Marcos State University (MMSU) iti Siudad ti Batac manipud iti President’s Farm ti unibersidad. Linawas a mayawis kadagiti interesado ti panagburasda iti nadumaduma a klase ti natnateng kas iti kamatis, tarong, sili, karabasa, tabungaw, kamotig, balangeg, utong, ken dadduma pay. Mayawis daytoy manipud alas 8 agingga’t alas 9 iti bigat, maminsan iti makalawas. Limapulo a pisos laeng ti ibayad iti kada supot ti maburas a nateng. “Napintas daytoy a sistema ta makamenoskami iti presio nangruna kadakami nga agad-adal," kinuna dagiti agkaskasera nga estudiante a nakapadas nga immay nagburas. Kuna met dagiti dadduma a "saan laeng a ti nalaka a presio ti masagrap, ngem ketdi makaited pay iti naisupadi a ragsak bayat ti panagburasmi iti natnateng.” Narugian a naburasan dagiti nateng idi Enero kas paset ti tinawen a "Parambak Ditoy Talon" iti MMSU. Iti ladawan, dagiti nakipagburas itay nabiit a teaching ken non-teaching staff ti nadumaduma a units ken colleges, agraman dagiti estudiante ti MMSU.

Indauluan met ni Dr. Marilou P. Lucas, Director ti Extension (tengnga, naka-green a t-shirt), ti grupo dagiti agpapaay iti MMSU Extension Directorate ti panangkitada kadagiti napan nakiburas. Ti President’s Farm ti pakaimulaan ti nadumaduma a klase a natnateng a masursurot dagiti technology intervention tapno mapangato ti apit. Karaman ditoy ti panagaramat kadagiti napasayaat a bin-I, panagaramat iti parsa (trellis), panagalep-ep, intercropping, ken dadduma pay. (Mercy R. Gaño)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.