Daydaywen dagiti tattao ti Santa Monica Church iti Ili ti Sarrat, Ilocos Norte sipud nayakar ditoy ti bangkay ni Niña Ruiz Abad manipud iti Municipal Public Cemetery idi Abril 7, 2024.
Ni Niña Ruiz Abad, 13, tubo ti Sarrat, Ilocos Norte, ket maysa a kandidato iti kinasanta.
Idi Abril 8, inawis ni Bishop Renato Mayugba a daulo ti Diocese of Laoag kadagiti kameng ti parokia nga iparangarangda ti padasda mainaig ken ni Abad, a maibilang nga "Adipen ti Dios."
Segun ken ni Mayugba, atiddog ti proseso sakbay a maideklarar a "santa" ni Ruiz, agraman ti pannakapatalged dagiti milagro a mainaig kenkuana, ket dida ammo no anianto ti pangngeddeng ti Simbaan iti daytoy.
Manipud Kadagiti Agdama a Kameng ti Bannawag: Dios ti Agngina!
Kinuna ni Mayugba nga ikarkararagda a ti pagayatan ti Dios ti matungpal.
Maibatay kadagiti testimonia, mailadawan ti biag ni Abad iti panagkararag, panagdayaw ken nasinged a relasion iti Dios, ken ni Jesus, iti Espiritu Santo, ken ni Birhen Maria.
Idi 1989, natakuatan nga adda sakit ni Abad a hypertrophic cardiomyopathy ken inatake iti puso bayat ti kaaddaana iti eskuela. Pimmusay ti ubing idi Agosto 16, 1993.
No agballigi, ni Abad ti kaubingan ken umuna a santa ti Filipinas.
Iti agdama, dua pay laeng ti santo a naggapu iti Filipinas, isu da San Lorenzo Ruiz (naideklarar idi 1987) ken San Pedro Calungsod (naideklarar idi 2012).
Babaen ti panagibunongda iti libro maipapan iti biag ni Abad, mangnamnama dagiti daulo ti simbaan ken dagiti mamati nga agbalin nga inspirasion ti pakasaritaanna a mangipangpangruna koma ti Dios ngem iti ania mnan a banag. (Leilanie Adriano/PNA//Lito Hilidon/Bannawag)
