Imballaag ti Philippine Atmospheric, Geophysical and Astronomical Services Administration (PAGASA) idi Abril 15, 2024 a dakkel ti posibilidadna a sagabaentayo latta ti napudot a panawen kadagiti masungad nga aldaw gapu iti panagsaknap iti pagilian ti easterlies (pul-oy nga aggapu iti Baybay ti Pasipiko).
Segun iti PAGASA, makarikna iti napudot a panawen manipud iti Abril 16 agingga 18 ti Metro Manila (24–36°C), Tuguegarao City (24-38°C), Legazpi City (25-32°C), Baguio City (17–27°C), Metro Cebu (26–32°C), Iloilo City (27–34°C), Tacloban City (25–32°C), Metro Davao (24–34°C), Zamboanga City (25–35°C), ken Cagayan de Oro City (24–32°C).
Iti sabali a bangir, 13 nga ili ti makarikna iti napeggad a pudot ita nga aldaw (Abril 15).
Kinuna ti PAGASA a makarikna iti 45°C a kapudot dagiti adda iti Dagupan City, Pangasinan; idinto a 44°C ti kapudot iti Puerto Princesa City, Palawan.
Manipud Kadagiti Agdama a Kameng ti Bannawag: Dios ti Agngina!
Makarikna iti 43°C iti ili Aparri, Cagayan.
Dagiti lugar a kas iti Ninoy Aquino International Airport (NAIA), Pasay City; Laoag City, Ilocos Norte; Tuguegarao City, Cagayan; Isabela State University (ISU) iti Ichague, Isabela; Clark Airport (DMIA), Pampanga; Aborlan, Palawan; Virac (Synop), Catanduanes; Masbate City, Masbate; Zamboanga City, Zamboanga del Sur; ken Cotabato City, Maguindanao ti makarikna iti 42°C a kapudot ti panawen.
Imballaag ti PAGASA a mabalin a pakaigapuan iti heat stroke ti kapudot manipud iti 42 agingga iti 51°C.
Nairekord ti PAGASA ti kabaraan a panawen a 48°C iti Roxas City, Capiz idi Marso 27, 2024. (Lizst Torres Abello/Manila Bulletin//Lito Hilidon/Bannawag)
