Mabalin a maimbestigar ti politiko a mangal-allukoy kadagiti kameng ti Armed Forces of the Philippines (AFP) nga isanuddan ti suportada ken ni Presidente Marcos Jr, segun iti Department of National Defense (DND) idi Abril 16, 2024.
Kinuna ni DND Secretary Gilberto Teodoro Jr. a maiparbeng ti pannakapalutpot dagitoy a panangallukoy ti maysa a politiko, idinto a salimetmetan ti AFP ti panangannurotda iti Konstitusion iti babaen ti Commander-in-Chief.
Iti kallabes, indagadag ni Davao del Norte 1st district Rep. Pantaleon Alvarez kadagiti kameng ti AFP nga ikkatendan ti suportada ken ni Presidente Marcos, tapno saan a kumaro ti riribuk iti West Philippine Sea (WPS).
Ni Alvarez ket kabunggoy ni dati a Presidente Rodrigo Duterte.
TURISMO: Intayon Idiay Ayuyang Garden iti Pila, Siudad ti Laoag!
Segun kadagiti diputado a kabunggoy ti administrasion, mabalin a maidarum ni Alvarez iti kaso a sedision.
Inkalintegan ni Alvarez a saan a maibilang a sedision dagiti imbalikasna idinto nga inyawisna ti natalna ken naurnos a wagas, saan ket a yaalsa ti publiko.
Ngem kinuna ni Cagayan de Oro City 2nd District Rep. Rufus Rodriguez, maysa a nasaririt nga abogado iti Kamara, saan a "natalna ken naurnos" a wagas ti awis a panangikkat ti suporta ti AFP iti situtugaw a Presidente.
Kinuna pay ni Rodriguez a di umno ti insawang ni Alvarez kas maysa nga opisial ti Kamara, idinto a maibilang daytoy a panagalsa. (Martin Sadongdong/Manila Bulletin//Lito Hilidon/Bannawag)
