Agtultuloy latta ti tinawen a “Balikatan Exercise" ti Armed Forces of the Philippines (AFP) ken ti United States Armed Forces (USAF) iti laksid ti pakdaar ti China nga ad-adda a saan a natalged ti Filipinas no mangawis daytoy iti sabali a puersa iti ruar ti rehion.
Maangay ti maika-39 a Balikatan Exercise manipud Abril 22 agingga iti Mayo 10, 2024.
Impaganetget ni AFP Spokesperson Col. Francel Margareth Padilla idi Abril 18 a saan a maibusor iti ania man a pagilian ti Balikatan Exercise nga isayangkat ti AFP, no di ket ti panagsanay, panagsaranay ken panakapatibker iti kinatalged iti rehion ti panggep ti Balikatan.
Idi Abril 17, impakdaar ni Chinese Foreign Ministry Spokesperson Lin Jian a no mangawis ti Filipinas iti sabali a pagilian iti West Philippine Sea tapno paneknekanna ti pigsana ken mangparubrob iti komprontasion, mabalin a kumaro ti tension ken mapukaw ti kinatalged iti rehion.
Manipud Kadagiti Agdama a Kameng ti Bannawag: Dios ti Agngina!
Manamnama a 16,770 a kameng ti AFP ken USAF ti aggiddan nga agsanay tapno mapatibker ti panagtinnulong ken panagsagana iti nadumaduma kritikal paset kas iti defense operation, cyber defense, counterterrorism, humanitarian assistance, ken disaster response.
Iti umuna a gundaway, nakipaset met ti Philippine Coast Guard (PCG) iti Balikatan Exercise.
Dumar-ay met dagiti kameng ti Australian Defense Force ken French Navy, idinto nga agpaliiw dagiti pagilian ti Japan, South Korea, India, Canada, United Kingdom, France, Thailand, Singapore, Vietnam, Indonesia, Brunei, Malaysia, Germany, ken New Zealand. (Martin Sadongdong/Manila Bulletin//Lito Hilidon/Bannawag)
