Sinagrap ti United Arab Emirates (UAE) ti kapigsaan a tudo iti las-ud ti 75 a tawen itay Abril 16, 2024 a nangtinep kadagiti kalsada ken iti Dubai International Airport.
Kanselado dagiti biahe iti eropuerto, idinto nga indagadag ti UAE National Committee for Emergency Management kadagiti residente nga agtalinaedda kadagiti pagtaenganda ken agtungpalda kadagiti pagannurotan maipanggep iti kinatalged.
Segun iti National Center of Meteorology, daytoy ti kapipigsan a tudo iti historia ti UAE, ta narimbawan daytoy dagiti nairekordda a datos sipud idi 1949.
Iti sabali a bangir, isagsaganan ti Migrant Workers Office (MWO) iti Abu Dhabi ken Dubai dagiti taraon ken dadduma pay a maitulong kadagiti Overseas Filipino Worker (OFW) a maapektaran ti layus.
Manipud Kadagiti Agdama a Kameng ti Bannawag: Dios ti Agngina!
Impakaammo ti Department of Migrant Workers (DMW) nga awan ti nadamagda a natay wenno nadangran nga OFW iti UAE, ket ikarkararagda nga agtalinaed koma a kasta. (Anadolu/PNA//Lito Hilidon/Bannawag)
