Maammuan ti kinaasino dagiti nangabak a mannurat a nakisalip iti Maika-25 a Salip iti Sarita ti AMMA Foundation Literary Awards inton Abril 25, 2024, Huebes.
Kinuna ti Secretariat nga apaman a madanon dayta nga aldaw, napatalgedanton dagiti hurado ti kinaasino dagiti nangabak, kas impanamnama ti Chair ti Board of Judges.
Siam a sarita ti naawat ti Secretariat ti AMMFLA a para iti daytoy maika-25 ken maudi nga edision ti salip iti panagsurat iti sarita a nairanta a para kadagiti agdadamo a mannurat iti Ilokano.
Naggibus ti salip idi Marso 15, 2024.
Ket Itartarayanmi Dagiti Bomba
Dagiti naisalip a sarita:
“Ti Regalo ni Neneng”; "Solis Terrarium 2099”; “Silaw ti Barrio”; “Nasirig nga Ayat Diay Patuk-ab”; “Siding”;
“Ti Katukad ti Isem ni Anaya Dela Cruz”; “Bag-en ni Amang”; “Adda Agur-uray Kenka Ditoy, Mar”; ken “Ti Nayaw-awan a Karnero.”
Nairanta ti pasalip ti AMMAFLA kadagiti agdadamo a mannurat iti sarita iti Ilokano a “kas pangaron iti reggetda a mangpatadem pay iti plumada.”
Dagiti gunggona: Umuna, PhP10,000.00; Maikadua, PhP8,500.00; ken Maikatlo, PhP7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.
Mapakaammuanto dagiti mangabak no kaano a maangay ti seremonia ti pammadayaw.
Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, ken da Francisco ken Aurora Ponce (agpapada nga agindegen iti Hawaii).
Inruar ti AMMAFLA ti librona a Dagiti Premiado a Sarita (1997-2014) a nagpaayan da Cles B. Rambaud ken Juan Al. Asuncion nga editor iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.
Dagiti isponsor ti maudi nga edision ti salip:
Para iti Umuna a gunggona: Mr. ken Mrs. Fred Dayoan, retirado a deputy sheriff ti San Francisco California (Sinait Ilocos Sur);
Para iti Maikadua a Gunggona: Jocelyn Dumlao Agustin, Mrs. Annak ti Kailokuan 2023 (Sarrat, Ilocos Norte); ken
Para iti Maikatlo a Gunggona: Jocelyn Dumlao Agustin & Family, Mrs. Annak ti Kailokuan 2023. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
