Maysa ni Presidente Ferdinand R. Marcos Jr. kadagiti binigbig ti TIME Magazine a "100 Most Influential People of 2024."
Binigbig ti TIME Magazine ti panangidaulo ni Presidente Marcos gapu iti panangiwanwanna iti ekonomia kalpsan ti angol, ken pannakaiparang ti Filipinas iti sangalubongan.
Dinayaw pay ti TIME Magazine ti kinatibker ti Presidente iti laksid ti panangriribuk ti China iti West Philippine Sea (WPS).
Segun iti insurat ni TIME correspondent Charlie Campbell, natibker ni Presidente Marcos iti pagtaktakderanna maibusor iti pagtaktakderan met ti China iti WPS ken pinabilegna ti aliansa ti Filipinas ken Estados Unidos iti tengnga ti umir-irteng a kasasaad iti rehion ken iti sangalubongan.
Manipud Kadagiti Agdama a Kameng ti Bannawag: Dios ti Agngina!
Kadua ni Marcos iti Leaders Category da Yulia Navalnaya, a balo ni Alexei Navalny; Poland Prime Minister Donald Tusk; Taiwan President-elect Willian Lai; Argentina President Javier Milei; Qatar Prime Minister, Sheikh Mohammed bin Adbulrahman bin Jassim Al Thani; World Bank Group President Ajay Banga; Italian Prime Minister Giorgia Meloni; ken Chinese Premier Li Qiang.
Nairaman met dagiti napalabas a Pangulo ti Filipinas a da Rodrigo Duterte idi 2017 ken Benigno Aquino III idi 2013. (Darryl John Esguerra/PNA//Lito Hilidon/Bannawag)
