Natignay ti Armed Forces of the Philippines (AFP) a mangisayangkat iti panagsukimat gapu iti naipadamag a yaadu ti bilang dagiti estudiante a Chinese a nakaenrol kadagiti pagadalan iti Cagayan iti baet ti agwarwaras iti socal media a panagamak maipapan iti panagespia.

Segun ken ni Kor. Francel Margareth Padilla, pannakangiwat ti AFP, napaliiwda dagiti report ti panagadu dagiti nasao nga estudiante iti Cagayan, maysa a probinsia iti amianan ti Filipinas nga asideg iti Taiwan.

Naireport nga immadu ti bilang dagiti estudiante a Chinese nga "agsursursor" iti Cagayan nangruna iti asideg dagiti lugar ti Enhanced Defence Cooperation Agreement (EDCA) iti probinsia.

Malagip nga inaprobaran ti gobierno nasional idi 2023 ti pannakaipasdek ti uppat pay nga EDCA site iti pagilian ket dua kadagitoy ti adda iti Cagayan: iti Camilo Osias Naval Base iti Santa Ana ken iti Lal-lo Airport iti Lal-lo.

Naipadamag met nga uray iti Cebu, a yan ti Benito Ebuen Air Base a maysa kadagiti lima nga orihinal nga EDCA site, immadu dagiti estudiante a Chinese.

Ibilbilang ti China a paset ti teritoriona ti Taiwan ket siguden a binallaaganna ti Filipinas a “saan nga agay-ayam iti apuy iti isyu ti Taiwan” bayat ti panangpabpabileg ti Department of National Defense (DND) iti presensia militar iti Amianan a Luzon.

Kinuna ni Kor. Padilla a nakikoordinardan iti Philippine National Police (PNP) tapno mapapigsa ti puersada iti Cagayan tapno mataginayon ti linak ken talna iti probinsia.

Iti met maysa a waragawag, inlawlawag ti gobierno probinsial ti Cagayan a nagpirma ti Commission on Higher Education (CHED) ken dagiti learning institutions ti China iti memorandum of agreement idi 2019 a mangipalubos iti panagenrol dagiti estudiante a Chinese iti probinsia.

Segun pay iti waragawag, “pasingkedan ti Opisina ti Gobernador (Manuel Mamba) iti publiko nga agdalan dagiti ganggannaet nga estudiante iti Cagayan iti umno a proseso ken addaanda iti umdas a dokumento. Tunggal ganggannaet nga estudiante a sumrek iti pagilian ken iti probinsia, masapul nga addaan iti student visa ken dadduma pay a kasapulan a dokumento nga inaprobaran ti Department of Foreign Affairs (DFA).” (MARTIN SADONGDONG/Manila Bulletin)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!