Ni HONOR BLANCO CABIE
1
marikriknak panaasna daydiay
sagsangkamaysa a barukongda
nga agpitpitik pay la't labes bantay.
manot' tawenen a napanda 'diay
disso pulos 'tay anniniwanda
saanen, 'tanud, a makataray.
isuda dagidi nangbambantay
ken apo goyo* insalakanda
idi lugarda 'diay a nagtaray.
tunggal dumteng ti mayo ta daydiay
inna a panagtao 'toy daga
malaglagipda nga awan sarday.
ay! ngem isuda a nangbambantay,
nangsalsalaknib, ta awan latta
ni maysa a bato – ay-ayda pay.
'tay rupada – ay! nakalidliday –
awan 'ti kiday ub-ubbing ita,
sabalin ti adda 'diay mugingda:
didan taliawen 'tay naggapuanda.
* gregorio aglipay cruz y labayán (mayo 5, 1860, batac-septiembre 1, 1940 manila), dati a katoliko romano a padi. naipumpon 'diay batac ngem naglemlemmeng ken nakirangranget, kaduana dagidi gerilia a sandataan a taga-pinili idi gubat dagiti filipino ken amerikano idi maika-20 a siglo; sinalakniban dagidi sandataan maliplipatanen ti ili.
2
immarubayanak luneta 'di
naminsan a kalman, atanud, 'diay
nangngegkot' baraptasan* ti puli.
lugayak dagiti nangirugi
iti daytoy nangted panagkidday
rehion pagilian a di maipakni.
manipud ilokandia agingga 'ti
lugar a mindanao naibarbartay
kararua ken panunot ti puli.
ay! simmalun-at 'toy riknak idi
babbai nga innem** tagasadiay
amianan nangibaklay 'tay kari.
adda't kulagtit diladat' kari
a mangriing, daytay mangmurmuray,
ti sudit' dilada di maiwaksi.
idi nalpas pabuyan rabii
'ti dalanko nakitak bambantay
yan talugading ken daytay bin-i:
kunak adut' pagtangtangsit puli.
* pinagtipon a panagdaniw dagiti 10 a finalist (3 tunggal grupo) – ken panangiladawan met, bilang non-contest intermission, dagiti 3 a kapampangan ken 3 met a nangipakita ti estilo ti bukodda a bukanegan -- iti napaspas a panagsao kas panagkansion iti rap iti ingles, inyam-ammo iti umuna a gundaway ti cultural center of the philippines kas panglagip iti immuna a balagtasan idi abril 1924.
** dagiti nakilaban: edlyn baniqued, deprisse guco, ken schulamight manzano – agpapada a filipino major manipud ilocos sur polytechnic college. dagiti kameng ti gumil filipinas a nagbukanegan a nangipabuya bilang intermission: aileen rambaud, leilanie adriano, ken estela bisquera guerrero.
3
kumpalong nga ay-ayam dakkelko*
idi awan muldot pay gurongna
sinarsarmingan man 'toy mugingko,
inar-arikap pay daytoy rikna.
awan nakitak ni maysa a pitting
kumpalong nga inar-arikapko,
'ti ngiwatna nakitak 'tay sarming
adut' impempenna't panunotko.
naannad ti amak ay-ayamna,
maysa dayta a naimutektekak,
adda kaniak 'tay impaimana:
yal-alikakakto met 'tay kukuak.
nabasak panid 'diay panagubing
iti kumpalong nga addaaan sarming.
* bernardo cc, nagay-ayam kumpalong (cowrie shells) idi ubing pay iti nakaipasngayanna
iti ili a paoay (sakup ti pinili itan ti lugar a nakayanakanna).
5 a Daniw
4
pagdaksannan dadduma no daytay
umarubayanen ti turogko
sadiay sumalsallabay dagitay
rikna ken sentimiento nga adu.
ringgorendak, anian pamay-anda,
agkakamakam ti ballikidko,
ballikidko ditoy, manen dita,
ay! dida pagtalnaen mugingko.
pagduaandak, sika, bangonendak
ta kakaasiakto't abayda,
sigkatendanto dagitoy matak,
masirsirpatko ti binnuligda.
arasaasakto ti turogko:
kunak 'madamdaman, atanudko.'
5
kuyem ti langit man bumangbang-es
awan kenkat' kinatakrot tapno
ikkam namnamat' tao nga adu,
isuda a kas man maiwallages.
kinadaeg dayta tangbaw daytay
daras mangitag-ay, mangted pay ti
ganaygay ken pammati ti puli
a didanto pulos nga agliday.
ay! sarapaem 'tay didigra no
'ti arubayanmi umangesen,
saluadam kad' 'toy paraanganmi,
ipusem 'diay digra ibasnotmo.
wen, mangnamnamaka daytoy pangen
naragsakto't aldaw ken rabii.
6
o apomi a dios, addakami
iti makanawanmo napnapno't
namnama isalakanmot' puli,
ilisinakami iti pungtot.
amami, dinakam' a baybay-an
inton aglennek init lubongmi,
di ipalubos a mayaw-awan
annakmo 'ti sipnget ti rabii.
kas met ken dimas* addaankam 'tay
panagbabawi ken pakumbaba,
panangipatpategmi 'tay sarday
awan, pateg bitbit ti karkarma.
o dios, ikararagannakami,
saluadam managbasol a puli.
* iti ebanghelio ni nicodemus, ni hestas ti birkog nga awan panagbabawi, nanginsulto pay ken ni hesus iti krus; ni dismas (dimas iti ilokano) a nakailansa met iti makanawan ni jesus ti nangballaag
ken hestas.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
