Nasurok a 16,000 a soldado ti Filipinas ken Estados Unidos (US) ti agsasarak iti nadumaduma a paset ti Luzon iti panangrugi ti maika-39 a Balikatan Exercise ita, Abril 22, 2024.
Malaksid iti dua a pagilian, umay met agpaliiw dagiti mangibagi kadagiti nadumaduma a pagilian a kas iti United Kingdom, Canada, France, Germany, Japan, Singapore, India, Brunei Indonesia, Japan, Malaysia, New Zealand, Singapore, South Korea, Thailand, ken Vietnam.
Iti umuna a gundaway, makipaset met dagiti kameng ti French Navy iti sangsangkamaysa a panaglayag dagiti bapor ti Filipinas ken US.
Kinuna ni Armed Forces of the Philippines (AFP) chief of staff Gen. Romeo Brawner, Jr. a maitampok iti daytoy a Balikatan ti pannakaaramat ti High Mobility Artillery Rocket System (HIMARS) Rapid Infiltration, Integrated Air and Missile Defense (IAMD), ken dadduma pay a ramit.
TURISMO: Intayon Idiay Ayuyang Garden iti Pila, Siudad ti Laoag!
Maangay ti Command and Control Exercise (C2X), Field Training Exercise (FTX), ken Humanitarian Civic Assistance (HCA) iti nadumaduma a lugar a kas iti Northern Luzon Command, Western Command, ken Southern Luzon Command.
Segun ken ni Brawner, buklen ti C2X ti Staff Exercise, Cyber Defense Exercise, ken ti Information Warfighter Exercise a mangsanay kadagiti soldado ti dua a pagilian a mangplano ken makikomunikar iti maysa a situasion.
Isayangkat ti FTX ti panagsanay ti nagtipon a puersa militar ti all-domain operation, agraman ti panangsalaknib iti teritorio iti taaw, air assault operation, ken dagiti nadumaduma a reconnaissance activities.
Mairaman met iti Balikatan ti HCA a pagnumaran ti lokal a komunidad a kas iti pannakaipatakder dagiti pasdek ti eskuela iti Ilocos Norte ken Cagayan, ken pasdek ti health center iti La Union ken Palawan.
Impaganetget ni AFP spokesperson Col. Francel Margareth Padilla a saan a maibusor iti ania man a pagilian ti naisayangkat a Balikatan nga agpaut agingga iti Mayo 10, 2024. (Aaron Recuenco/Manila Bulletin//Lito Hilidon/Bannawag)
