Indauluan ni Ma. Lourdes Ladi Opinaldo dagiti nangabak a mannurat iti Maika-25 a Salip iti Sarita ti AMMA Foundation Literary Awards, kas impakaammo ti Secretariat ti AMMAFLA.
Pinangyalat ni M.L.L. Opinaldo iti Umuna a Gunggona ti saritana a ti ”Katukad ti Isem Ni Anaya Dela Cruz.”
Tubo ti Ar-arampang, Balaoan, La Union, adda ita ni Opinaldo iti Taiwan a kas OFW. Malaksid iti panagsursuratna iti daniw, sarita, ken salaysay, agduyos pay ni Dhez, awagna kadagiti kasingedna, iti panagpinta, panagkanta, ken panaggitarra. Addan naipablaakna a sinurat ken ilustrasionna iti Bannawag. Sumagmamano kadagiti artwork-na ti naaramat nga akkub dagiti libro. Kas mannaniw, nangabak iti Umuna a Gunggona iti Salip iti Daniw ti 6th Gabriela Prize (2023) babaen ti daniwna a ”Ti Dalan nga Agpa-Tammugong.”
Kakadua ni Opinaldo a nangabak da:
Ket Itartarayanmi Dagiti Bomba
Arnel M. Asis, Maikadua a Gunggona, babaen ti saritana a “Ti Nayaw-awan a Karnero.”
Sangapulo a tawenen a mangisursuro ni A.M. Asis iti Bacarra National Comprehensive High School, Bacarra, Ilocos Norte a pagpapaayanna a kas Master Teacher I. Iti agdama, agbasbasa iti Philippine Normal University iti kurso a Doktor ng Pilosopiya sa Edukasyong Pangwika sa Filipino iti babaen ti Linking Standard and Quality Practice. Adda metten dagiti naipablaakna a salaysay ken ababa a sarita iti Bannawag. Buridek iti uppat nga annak da Ruben Asis ken dati a Jesusa Maluyo iti Brgy. 4, San Simon I, Bacarra, Ilocos Norte.
Leah Gaborno Tabieros, Maika-3 a Gunggona, babaen ti saritana a “Siding.”
Adda ita iti Al Jawa Qassim City, Saudi Arabia, kas OFW. Addaanda iti tallo a bunga ken Orlando Tabieros Jr. ti Gonzaga, Cagayan, nga agpapada a nagturpos iti Edukasion. Maikalima nga anak da Juanito Calma Gaborno ti Solano Nueva Vizcaya, ken dati a Rosita Baligad ti Guimba Nueva Ecija. Gapu iti trabaho ti amana, nagyanda a sangapamilia iti Aparri, Cagayan nga isu metten ti dimmakkelan ken nagbasaanna. Nagturpos iti Cosmetology a nagbalin a pamastrekanna agingga iti napanunotna ti ag-OFW.
Dagiti nangbukel iti Hunta Dagiti Hurado: Linda T. Lingbaoan-Bulong, dati a kameng ti Bannawag ken nagretiro a Senior Editor iti UP Press (pangulo), Lito P. Hilidon, Content Producer ken Entertainment Editor ti Bannawag, kameng; ken Roy V. Aragon, Content Producer ken Poetry Editor ti Bannawag, kameng.
Imatmatonan da Amado ken Gloria Yoro (Nevada, U.S.A), ken Francisco ken Aurora Ponce (Hawaii, U.S.A.) ti AMMA Foundation Literary Awards. Kadagiti napalpalabas a tawen, nagbalin a katinnulongda da Mario Orbito (Hawaii) ken Fred Quibol (Hawaii).
Dagiti isponsor ti maika-25 nga edision ti salip:
Para iti Umuna a gunggona: Mr. ken Mrs. Fred Dayoan, retirado a deputy sheriff iti San Francisco, California, U.S.A. (Sinait Ilocos Sur);
Para iti Maikadua a Gunggona: Jocelyn Dumlao Agustin, Mrs. Annak ti Kailokuan 2023 (Sarrat, Ilocos Norte); ken
Para iti Maikatlo a Gunggona: Jocelyn Dumlao Agustin & Family, Mrs. Annak ti Kailokuan 2023.
Daytoy Maika-25 a Salip iti Sarita ti maudi a pasalip iti panagsurat iti sarita ti AMMA Foundation Literary Awards.
Iti pannakaigibus ti AMMAFLA, isagsaganana met ti pannakairuar ti libro a Dagiti Premiado a Sarita (2015-2024) a pagpaayan nga editor da Juan Al. Asuncion, Managing Editor ti Bannawag, ken Cles B. Rambaud, Editor ti Bannawag, ken Pangulo ti Secretariat ti AMMA Foundation Literary Awards (1997-2014).
Sakbayna, nairuar ti libro ti AMMAFLA a Dagiti Premiado a Sarita (1997-2014) a nagpaayan met laeng da Asuncion ken Rambaud nga editor. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
