Am-amirisen ni Sen. Sherwin "Win" Gatchalian ti panangisingasingna iti linteg a mangiparit iti panagusar iti selpon dagiti agad-adal iti hayskul ken elementaria, tapno maaddaanda iti panawen nga agbasa iti libro.
Iti naangay a Kapihan sa Senado, imbatad ni Senador Gatchalian ti paliiw dagiti sabsabali a pagilian nga adu dagiti ubbing a nailuod iti panagusar iti selpon uray iti uneg ti pagadalan, ket imbes nga agbasa, agbuyada ketdi iti YouTube ken Tiktok.
Innayon ni Gatchalian nga agawen ti selpon ti oras dagiti ubbing nga agbasa, agraman ti orasda nga agadal ken makilinnangen iti padada nga ubbing.
Ket tapno maallukoy dagiti estudiante nga agbasa, sisasagana ni Gatchalian a mangilungalong iti Senate Bill (SB) No. 475 wenno ti National Reading Month Act iti Senado.
Manipud Kadagiti Agdama a Kameng ti Bannawag: Dios ti Agngina!
Iti singasing a linteg, matudingan ti bulan ti Nobiembre a kas National Reading Month tapno maipakadawyan ti panagbasa kadagiti elementaria ken ti kagimongan.
Babaen daytoy, mamandaran dagiti biblioteka (library) ken Public Telecommunications Entity a mangipaay iti libre nga akses kadagiti edukasional a reperensia iti online.
Kinuna ni Gatchalian a panggep ti SB 475 a tingitingen ti saan a nasayaat a resulta a nagun-od dagiti estudiante a Filipino kadagiti international assessment, kangrunaanna iti panagbasa. (Wilnard Bacelonia/PNA//Lito Hilidon/Bannawag)
