Kayat nga ipasubli ni Camarines Sur 2nd District Rep. LRay Villafuerte ti work-from-home (WFH) a wagas ti panagtrabaho dagiti kameng ti gobierno ken pribado a sektor, tapno mailisi dagiti mangmangged iti nakaro a kinadagaang.
Amken ni Villafuerte, pangulo ti National Unity Party (NUP), a mabalin a ngumato iti 52°C wenno nangatngato pay, ti kapudot ti aldaw kadagiti masungad a lawas.
Kinuna ni Villafuerte idi Abril 26, 2024 a nasken a panunoten dagiti dadaulo ti gobierno ken pribado a panggedan ti panakaisubli ti WFH no mabalbalin, tapno masalakniban dagiti mangmangged iti nakaro a kinadagaang a dinegdegan pay ti El Niño phenomenon.
Kinuna ni Villafuerte a rumbeng a mapalubosan dagiti empleado nga agtrabaho iti balayda, nangruna dagiti senior citizen, gapu ta kumarkaro ti pudot.
TURISMO: Intayon Idiay Ayuyang Garden iti Pila, Siudad ti Laoag!
Dinakamat ni Villafuerte ti Republic Act (RA) 11165, wenno ti Telecommunicating Act of 2018, a nangted iti karbengan kadagiti empleado ti pribado a sektor nga agtrabaho kadagiti pagtaenganda babaen ti panagaramat iti teknolohia kas iti kompiuter ken internet, ngem saan a maikaniwas iti linteg ti panagtrabaho.
Innayon pay ni Villafuerte a maipalubos met kadagiti empleado ti gobierno ti WFH, kas mayannurot iti Civil Service Commission (CSC) Memorandum Circular (MC) No. 6, a naipaulog idi Hunio 6, 2022.
Imballaag ni PAGASA Assistant Weather Services Chief Ana Liza Solis a mabalin a pakaigapuan ti heat stroke ti nadagaang unay a temperatura. (Ellson Quismorio/Manila Bulletin//Lito Hilidon/Bannawag)
