Adda inwayat dagiti cybercriminal a baro a wagas ti phishing, wenno panangala iti sensitibo nga impormasion kas iti bank account, babaen ti panagpammarangda a kameng ti Land Transportation Office (LTO).
Puntiria dagitoy a cybercriminal dagiti banko a BDO, RCBC, ken dagiti agus-usar iti Maya ket agpammarangda a kameng ti LTO.
Makaawat iti text message ti biktima nga agkunkuna nga adda linabsingda a linteg-trapiko, a napakuyogan iti link ti peke nga LTO website.
No maiklik ti peke a website, kiddawen daytoy nga isuratda ti plate number ti luganda, ket iparangna dagiti nadumaduma a banko, kas ti BDO, RCBC ken Maya mabalinda a pagbayadan, tapno agparang a mapagtalkan.
TURISMO: Intayon Idiay Ayuyang Garden iti Pila, Siudad ti Laoag!
Kalpasan a nakapili iti payment option, maipan iti peke a login page nga agpampammarang a kas lehitimo a banko, ngem panggep daytoy a takawen dagiti sensitibo nga impormasion ti akinkukua iti bank account, tapno maaddaan iti akses dagiti cybercriminal.
Mapakdaaran dagiti agus-usar nga iberipikarda nga umuna dagiti maawatda a mensahe nga aggapu iti LTO wenno banko tapno mapatalgedanda no pudno dagitoy, tapno saan nga agbalin a biktima daytoy nga scam. (Art Samaniego/Manila Bulletin//Lito Hilidon/Bannawag)
