Ni ROSITA VILLEGAS-RAPANOT kas insalaysayna ken ni MANCIELITO S. TACADENA
ADDAAK iti elementaria idiay Gonzaga, Cagayan a nakayanakak ken idi umuna a masumokko ti agbasa iti Bannawag. Pasaray ag-agawek ken ni nanang ti kopiana ta kayatko a siak ti umuna a makabasa iti komiks a pagbidaan ni Tecla (”Biag Ti Filipino”) ken ti komiks nga ”Apuy iti Agpatnag.” Idi agangay, kaayatanen ni nanang no kasdiay nga alaek ti Bannawag aglalo idi mangngegna a napaspasakon nga agbasa.
Wen, ti Bannawag ti nagsursuruak tapno lumaingak nga agbasa. Ngem idi agbasaakon iti hayskul, innalanak ti ikitmi sadiay Manila ket idiayakon a nagnaed isu a naisardeng ti regular a panagbasak iti Bannawag. Nupay kasta, pasaray paipaw-itko dagiti daan a kopia ti Bannawag no adda agpa-Manila ket isu ti basbasaek.
Iti sagpaminsan a panagawidko idiay Cagayan, sapulek latta met dagiti kopia ti Bannawag ni nanang ken itugotkonton iti panagsublik manen iti Manila. Pasaray adda met idi malabsak nga aglako iti Morayta ket gumatangak. Agingga a nagassawakamin ken lakayko ken naaddaankamin iti uppat a bunga. Nakumikomak iti akemko a kas ina ken gapu iti panagsublik nga agbasa iti kolehio agingga a nalpasko ti kursok a Bachelor of Science in Public Administration iti Trinity University of Asia iti tawenko a nasurok nga uppat a pulo.
Idi 2018, nagawidkamin ditoy San Pedro, Siudad ti Vigan, a lugar ni lakayko ta agpadakamin a retirado. Iti naminsan nga ipapanko idiay tiendaan, dimmagasak iti newstand tapno gumatang iti pagiwarnak. Idi agbayadak, nakitak ti Bannawag a basbasaen ti aglaklako. Kasla nasarakak ti maysa a kasingedko a nabayagen a diak nakitkita! Dagus a gimmatangak ket manipud idin, regular metten a naaddaanak iti kopia ta bayadakon nga umuna tapno sigurado nga adda mabagik.
Nobiembre 16-31, 2024 a Bilang
Impasnekko ti agbasa iti daytoy ket pasaray pagimonan sa payen ni lakayko ta pasaray diak metten maaramid a dagus ti paobrana. Idi nagpandemia, kinuna ti paggatgatangak nga awan ti sumangsangpet a kopia ti Bannawag gapu siguro iti rigat ti panagibiahe. Alla, no ti danagko. Kasanon a mabasak dagiti paggugustok a nobela?
Imbagak ngarud ken ni Rosemary Joy a balasangmi a yorderannak iti Lazada nga agingga ita, isun ti ar-aramidenna tapno adda latta kopiak. Malaksid kadagiti nobela, kaay-ayok a basaen ti benneg a ”Kastoy Idi.” Kas man agsubliak iti kinaubingko no mabasbasak dagiti paspasamak idi naglabas a tiempo.
Dagitoy met appok a da Olivia Mae (Grade 2) ken Florence Danielle (Kinder) ti pasaray makiinnuna kaniak ita a mangukrad iti Bannawag. Pagtarusanda a basaen ti Sarita ken Daniw a Para Ubbing ket nupay ad-adda nga English ken Tagalog ti pagsasaoda, nalaingda metten nga agbasa ken agsao iti Ilokano gapu iti Bannawag.
Ita, ur-urnongek dagiti kopia ti Bannawag ket anian ta adda daydi gundaway a pagaronda koman ti pinanidna. Naimbag laengen ta nakitak sakbay a pigisenda. Nakaungetak la ket ngarud a dina oras. Wen, ta napateg kaniak dagiti kopiak ta pasaray ulitek pay a basaen ti linaonna a kas pangalak iti turogko ken pangur-urayak metten a iti sumaruno nga issue. –O
TI AUTOR: Nagpaay iti Methodist Social Center a kas Program Coordinator, sa iti Kapatiran Kaunlaran Foundation a kas Program Coordinator on the Rehabilitation of Women Drug Abusers. Idi agangay, nagtrabaho iti Trinity College a kas community coordinator ti extension program agingga a nagretiro a kas Secretary to the Dean of the College of Business Administration ti nasao a pagadalan. Addaanda iti uppat a bunga ken ni Florencio Rapanot a nagretiro met a kas kameng ti Philippine Coast Guard: Rosemary Joy, adda iti real estate; Hanson John, addaan iti welding shop; Kurt Jason, agtrabtrabaho iti maysa nga advertising firm; ken Nico Jerms, maysa a chef.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
