Ni METUDIO R. YADAO kas insalaysayna ken ni MANCIELITO S. TACADENA
AP-APALAK idi ni kasinsinko a Manang Teresita Idica ta napaspas ti panagbasana iti Ilokano. Ubingak pay idi. Kiniddawko nga isuronak met nga agbasa iti napaspas. Ket ditoyen a nailuodak iti Bannawag ta Bannawag la ngarud ti intedna a pagsursuruak. Adu ngamin ti Bannawag iti balayda iti barioda a Paratong ditoy ilimi a Sinait (Ilocos Sur). Aggapuak idi iti Binacud a bariomi, di kad’ pagnaek ti mapan nga innem a kilometro ta ti Paratong, adda iti igid ti baybay ken asidegen iti ili ti Cabugao idinto nga adda iti medio daya ti Sinait ti bariomi.
No apay a kunak a nailuodak iti Bannawag, gapu ta magusgustuak idi dagiti komiks a kas iti ”Kenkoy” ken ”Atong Rungrong.” Basaek payen dagiti prosa a nobela a kas iti ”Maingel iti Sierra Madre.”
Kalpasan ti panagturposko iti hayskul, nagsardengak a nagbasa ket napanakon nagtrabaho iti maysa a paktoria ti plywood sadiay Cagayan. Ngem kalpasan ti nasurok dua a tawen, nautobko a masapul nga adda met magtengko iti biag ket indariragko kadagiti dadakkelmi nga agtuloyak nga agbasa. Napanak ngarud sadiay Manila ket nagbasak iti Araneta University Foundation iti kurso a mainaig iti Agrikultura. Kadagitoy a gundaway, naisinaak metten iti Bannawag.
Idi malpaskon ti kolehio, nagsubliakon iti Ilocos Sur ket impasnekkon ti nagtrabaho ken naaddaanakon iti bukod a pamilia. Intuloyko metten ti nagbasa iti Bannawag—agingga ita. Awanen dagiti nobela a kas iti “Maingel iti Sierra Madre” ngem adda met dagiti nobela ni Norberto D. Bumanglag Jr. a napnuan aksion a kasla agbuybuyaka iti Hollywood films. Nupay numero uno kaniak dagiti nobelana, magustuak met dagiti dadduma pay a nobela iti Bannawag.
TI BANNAWAG KEN SIAK (41): Kasla Adda Naglukat a Baro a Lubong
Iti kaundayen ti panawen nga agbasbasaak iti daytoy a magasin, makunak nga adun dagiti nagbaliwan dagiti istoria. Makunak nga upgraded version itan dagiti obra maestra dagiti mannurat; talaga met a mayatadayen iti agdama a panawen. Naparpardas itan a pagdasigen ti kadaanan ken kabaruanan nga istoria ita ta maisubsubli a maipabpablaak dagiti istoria a naipablaak limapulo, innem a pulo a tawenen ti napalabas.
Diak ilibak nga adda dagiti makakitkita kaniak nga agbasbasa iti Bannawag nga agkuna nga agsaysayangak la iti oras nga agbasa. Dida mautob no kasano ti kinapateg kaniak ti linaon daytoy a magasin. Dagiti laengen salaysay da Prop. Felix Eslava Jr. ken Dr. Abe Rotor, nagadun nga impormasion ti maad-adalko kangrunaanna kadagiti isyu a makaapektar iti aglawlaw a kas iti napalalon a kinapudotna, ken dadduma pay. Iti ababa a pannao, no agbasaka iti Bannawag, saanka a maudi iti damag a maisupiat iti ibagbaga ti dadduma a no sika ti naudi a nakadamag iti agtre-trending nga isyu wenno “marites,” ibagada a ”nabannawagkan.” Isu nga amin a kopiak ti Bannawag, iduldulinkon nupay idi la tiempo ti pandemia ti pannakalagipko a nangurnos iti koleksionko ta adu dagiti inanay. Nagladingitak iti pannakadadael dagitoy. Nupay kasta, dagiti agbalin pay laeng, inurnosko iti tunggal tawen ket binaliwak nga insimpa tapno mataginayonda.
Tunggal adda malagipko nga autor iti napalabas, mapanak iti nakaidulinan dagiti koleksionko a Bannawag; sapulek dagiti gapuananna ket ulitek a basaen dagiti putarna.
Wen, diakto a pulos isardeng ti agbasa iti Bannawag a nagbalinen a paset ti biagko sipud nasursurok ti agbasa agingga ita a maysaakon a retirado. –O
(Agnaed ni Apo Metudio ken ti kasimpungalanna a ni sigud nga Anita Cabiltes iti Brgy. Binacud, Sinait, Ilocos Sur ken naaddaanda iti dua nga annak. Nagretiro a kas Agricultural Technologist iti Municipal Agriculture Office ti LGU ti Sinait idi 2008.)
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
