Impetteng ti Department of Foreign Affairs (DFA) itay Mayo 7, 2024 a saan a nakitulag ti asino man nga opisial iti Administrasion ni Presidente Ferdinand Marcos, Jr. iti China mainaig iti Ayungin Shoal.
Daytoy ti imbatad ti DFA kalpasan nga impakaammo ti embahada ti China nga adda kano baro a katulaganda iti Filipinas mainaig iti Ayungin Shoal.
Segun iti China, adda napagnunumuan dagiti dadduma nga opisial ti agdama nga administrasion malaksid pay iti "gentleman’s agreement" ti China ken ni dati a Presidente Rodrigo Duterte tapno agtalinaed ti agdama a kasasaad iti West Philippine Sea (WPS).
Ngem kinuna ti DFA nga awan ti tulag ti China ken ti gobierno ti Filipinas, ket palso ti impadamag ti China tapno maallilaw dagiti Filipino mainaig iti parikut iti WPS.
Inlawlawag ti DFA a ti laeng Presidente ti Filipinas ti addaan iti kalintegan a makitulag iti nagan ti Filipinas mainaig iti WPS.
Iti sabali a bangir, kinuna ni Navy Spokesman for the West Philippine Sea Commodore Roy Vincent Trinidad a parparbo daytoy nga ibagbaga ti China tapno kalubanna dagiti panaglabsingna iti sangalubongan a paglintegan, ken mamagsisina kadagiti Filipino tapno maipatungpalna ti gandatna iti WPS. (Ma. Teresa Montemayor/PNA/Lito Hilidon/Bannawag)
