TI BANNAWAG KEN SIAK (29): Agbasa iti Bannawag, Saan nga Agay-ayam-Bannawag

Ni LEONOR PAMANI PADAONG kas insalaysayna ken ni MANCIELITO S. TACADENA

AGTAWENAK iti lima idi maawis ti riknak a mangukrad kadagiti panid ti Bannawag. Agpada a managbasa iti Bannawag dagidi dadakkelmi ket linawas nga adda latta baro a kopia ti Bannawag iti pagtaenganmi. No malagipko, agpateg laeng iti pitopulo ket lima a sentimo ti maysa a kopia ti Bannawag idi.

Medio estrikto daydi amami ket dina kayat nga awan ob-obraenmi isu nga iti nawaya nga orasko, agbasaak iti Bannawag imbes nga innak makiay-ayam kadagiti kabaddungalak iti ruar. Kas maysa nga ubing, immuna a binasak dagiti nobela a komiks nga addaan iti namaris a ladawan. Idi agangay, basaek metten dagti nobela, daniw, ken kolum. Maysa kadagiti paggugustok a basaen idi ti kolum a “Malutluto, Maib-ibus” ni Arturo Padua.

No tiempo ti tudtudo ken panagbabagyo, saankami a makapan diay ili ti Vigan (siudad itan) ta makuna a putputong ti Barangay Pantay Tamurong, Caoayan (Ilocos Sur) a lugarmi. Ayna, ket mapankami agsapul kadagiti kakaarruba wenno kasingedmi a nakagatang iti nalibtawanmi a bilang ti magasin ket bulodenmi tapno laeng mabasami ti tuloy dagiti istoria a padpadaananmi. Dagiti kopiami, induldulinmi a kas koleksion ngem anian ta lalayusen ti barangaymi isu a no adda dagiti napigsa a bagyo a mangduprak iti Ilocos Sur, madadaelda metten gapu iti layus a kas napasamak iti iduduprak ni Bagyo Egay itay napan a tawen, nadadael manen amin dagiti naurnongko a Bannawag.

Ti pay maysa a nagparikutak kadagitoy napalpalabas a tawen ket no kasano a maaddaanak iti kopia ti Bannawag. Ngamin, awan metten makitkitak nga aglaklako iti Bannawag sadiay Siudad ti Vigan. Naimbag laengen ta addan magatang online isu nga iti Shopee itan ti pagor-orderan ti anakko. Tunggal bulan ti panaggatangko tapno makalakaak iti shipping fee.

Wen, ikagumaanak latta ti makaiggem iti Bannawag ta kas man adda kurang iti biagko no diak maukrad dagiti pinanidna. Kinapudnona, nagbalinen a kadkaduak aglalo idi mabaloak sumagmamanon tawen ti napalabas.

Marayray-awak a mangbasbasa kadagiti linaon ita ti Bannawag a kas iti komiks nga ”Empoy da Teribol” ni Cles B. Rambaud kasta metten dagiti nobela a ”Ti Lunod” ni Norberto D. Bumanglag Jr. ken ”Daddy Balo” ni N.M.E Valdez.

Makumikom met aminen dagiti annakko kadagiti trabahoda ngem dida met maliwayan a basaen ti Bannawag ken aminda ti met ”Ti Gasatmo” ti padpadaananda no kua. No adda met dagiti Ilokano a balikas a dida ammo ti kayatna a sawen, siak ti pagsaludsodanda.

Adda met maysa nga apokok, ni Aim Regella, nga addan iti umuna a tukad ti elementaria a makitak nga addaan essem nga agbasa iti Bannawag. Kanayon nga umay tapno alaenna dagiti naurnong a kopia ti Bannawag ket pamrayanna ti agtarus iti kalapaw iti likudan ti balay; agyan iti indayon ket idiayna a basaen ti magasin. –O

(Nayanak ni Leonor Pamani Padaong idi Hunio 27, 1953 sadiay Pantay Tamurong, Caoayan, Ilocos Sur. Nayasawa ken ni Reynante Padaong (pimmusayen) ken naaddaanda iti lima a bunga, da: Nory, Reden, Lorene, Reynalyn, ken Regine.)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine