Sinurat ni AMADO I. YORO

PABOR WENNO SAAN A PABOR ITI KASTOY A KITA TI PANAGDENNA?

MODERATOR:

Pagraragsakan la daytoy kakailian
Dawatenmi awan koma ti masilsilian
Dagitoy mismo nga agkasingin intay' ida iparang
Ti pagtakderanda a panid ken dependaran

Laban iti saritaan, saan a laban iti ima
Saan nga arnis ti kampilan, arnis la ti dila
Iti pudno a biag, nayanakda iti sakramento ti kallaysa
I'toy a bukanegan, bay-antayo a balubalan-sarita

KASAR NGA UMUNA, itakderan ni Leticia

LIVE-IN LATTAN, kuna met ni Perlita

RASON NI LETICIA (KASAR NGA UMUNA) #1

Naimbag nga orasyo, appo a timmalantan
Kablaawankayo aldaw a nainggasatan
Piesta ti barrio ti intay' rambakan
Panagdenna ti topikotayo i'toy a bukanegan
Klase wenno kita ti panagdenna ti pagsaritaan.

Irasonak iti biangko, kallaysa pay ti mapasamak
Diak kayat nga agdennakami no awan ti pagbatayak
Sakbay a kadennak ti asawak
Kayatko a kallaysa nga umuna ti mapasamak
Ngamin ti sagrado nasantuan ti sakramento
Talgedko iti denna ti ay-ayatek saanak nga agriro.

RASON NI PERLITA (LIVE-IN) #1

Kalabanko i'toy a bukanegan, kasinginko iti pudno nga ina
Paborak ti live-in itoy a bukanegan, kita ti panagdenna
Ngem pakawanennak, Apo Diosko, saan met ketdi
Iti pudno a biagko, saan met ketdi a maapasamak dayta.

Live-in, panagdenna nga awan ti kasar wenno kallaysa
Naimbag a tulagan ti agayan-ayat iti panagdennada
Saan a nasken a disturbaren ti pastor wenno padi dita
Malaksid a maliklikan ti gasto kinangina ti trahe de boda
Masalbar pay ti padaya ken pabpaboda ken pabpabuya.

RASON NI LETICIA (KASAR NGA UMUNA): #2

Saan met a nasken ti trahe de boda iti kasar nga umuna
Ti nasken laeng ket pannakaannong ti kari ken sapata
Sanguanan ti padi, pastor, wenno husgado a makuna
Maited ti naan-anay a sakramento, paset kannawidan ken kultura
Kinadayaw ti pamilia ti pakasaritaantayo nga Ilokana.

RASON NI PERLITA (LIVE-IN) #2

Saan met a panangtallikud kannawidan ken kultura
No ti live-in ti surotek urnos ti panagdenna
Uray man ketdi mano a saksi, padrino-padrina dita
Adda wenno adu met ti ammok agaapa-agsisina.
Uray mano a karkari, padpadrino, padpadrina
No managapada met nga awan a pulos urnosda
Kadaksanna pay, adda pay pinnatay
Domestic violence, kinadamsak iti pamilia
Naimbag la koma no agsinada a "sina baket, awan dakdakes"
Diborsio, alimony la koma
Ngem anian a kas-ang, matay asawa, mairaman pay annakda

No dadduma iti panagkasar iti naranga, dayta pabuya
Kunak pay a pammarang ken panagbarayuboy no dadduma
Agasem met ngamin ti no mano a nuang, baka ti mapadara
Dakkel nga agpayso a pabunar, panagpabulallek padaya
Ngem manen, puera delos buenos, adu met latta ti agsisina.

Iti sabali a bangir, adda met am-ammok
Saanda met nagkasar, naurnosda met latta
Sweet na sweet-da met iti panagbiagda
Makitak met a naurnos iti umariweswes nga annakda.

RASON NI LETICIA (KASAR NGA UMUNA) #3

Por dios por santo, kaasiannakami koma, Apo
Nayaw-awan san 'toy kabukanegko
Tuladenna metten dagiti ugali iti dayo
Ti nariingannan a kannawidan tallikudannan a napalalo.

Siak la a maysa, ikalikagumko latta iti ay-ayatek
Agkasarkami pay nga umuna sakami agkinnayetket
Panangtagikuana iti napateg nga ayatko awan pagkunaanna
Saanak ketdi a pasagid no saannak pay nga inkallaysa.

RASON NI PERLITA (LIVE-IN) #3

Kabsatko ken kabukaneg, agmulagatka man
Iti laud-daya, amianan, ken abagatan
Denggem ti damag dita, ditoy, ken idiay pay
Iti man radio, telebison, wenno warnakan
Ne, da kastoy ken kasdiay, nagsinadan
Diborsio dayta, alimony, nalpaskan
Yanna ngarud ita a pammaltalged ti kunam a kallaysa pay
Ne, ne, daydiay, simmurot ken ni didiay
Aysus, nagadu pay iti makilinlinnemmengan dita.

RASON NI LETICIA (KASAR NGA UMUNA) #4

Adda met la kadagiti maseknan dayta, kabukanegko
Ti la met bagik ti ikalintegko
Dayaw kunak man, asawa ken pamilia
Awanto ti pagkurangak no aramidek ti kaisuanna.

Dayaw, wen, dayaw, kasupangal
Dagiti annak, ania pay dayta a dayaw
Iti gimong, eskuela ,ania ti makitam a kurang
Saan kadi a ti makuna a legitimate nangruna unay
Iti salikepkep ti pamilia a nadayaw
Ken adda iti kahustuanan.

RASON NI PERLITA (LIVE-IN) #4

Ah, ti dayaw, tawid, ken sanikuan sa ti inka ambingan
Para kenka dayta ken annakyo pagpasindayaw
Gustuem sa ketdi ti maawagan iti Mister and Misis, aya
Iti imatang ti tao, gimong, ken eskuela a kuna
Ngem kitaem met ita no ania ti banagna
Dagiti naruay, agkikinnamat a damag dagiti agsisina
Dagiti broken family, adda kadi ngarud urnosda?
Isu met la nga isu a dayaw iti urnosda no naurnosda
Isu met la a pakaibabainanda no nakiroda nga agdenna.

RASON NI LETICIA (KASAR NGA UMUNA) #5

Uray an-annuennak, diakto ipalubos a sagidennak
Ti boyfriend-ko no awan ti kasar a mapasamak
Ammok a maawatannak no isu ti kalikagumak
No saannak a maawatan awanto met pagbabawyak
No naalananto ti kaykayatna diak ammot' aramidenna kaniak.

RASON NI PERLITA (LIVE-IN) #5

Kaniak a biang, awan met pagdaksan ti live-in lattan
Nasken kaniakon ti naurnos ken napateg a kinnaawatan
Ti nasken, no ania ti sapulna, teggedna, pakaidayawan
Awan ti apa a kanayon; binnarsak wenno disnog a naynay ditan
Manganak, mangan met natgedanmi a taraon
Saan ketdi kas kadagiti nagkasar nga umuna ngem linnanggongan
Aramid ti maysa, abusado dita ken ditoy, damsak makarimon
Puera de los buenos manen, kaaduanna nagadun nasabidong.

RASON NI LETICIA (KASAR NGA UMUNA) #6

Kunak manen, kasar nga umuna, ikalintegak ti dayaw
Kaugalian ni Ilokana, saan a parparawpaw
Diak pay la isukat ti insursuro da lelong ken lelang
Pateg ti kallaysa, sakramento a nadayaw
Kas iti pateg ti kunada, sarming a paganninawan
Kas iti itlog dayta no malittikan saanen nga agpulang
Ti rikkina, uray an-anuem rikkina lattan
Isu a kallaysa nga umuna kunak latta
Uray ti nasagraduan a rabiik nga innak matagikua
Ti dayaw ti pulik, ti kina-ilokanak, nayanak iti away
Saan ketdi a tuladek iti kaaduan a paspasamak iti Hawaii.

RASON NI PERLITA (LIVE-IN) #6

Kunak met nga awan dakesna iti live-in itan
Nupay iti pudno a biagko, diak kalikaguman
Ngem gapu laeng i'toy a saritaan iti bukanegan
Kunak manen, Apo, innak Kenka agpakawan
'Toy kabsat, ammok nga addaan pagrasonan
Ngem i'toy a pagraragsakan, piesta a kasta unay
Kunak kadagiti agbuybuya, agdengdengngeg itan
Adda kadakayo, sapulenyon ti inkay' pagsaysayaatan
Saludsodem iti bagim: rumbeng kadi wenno saan
Nga aramidek dagitoy no diak met paglaingan
Dagitoy ti aramidek, gapu ta isu ti innak pagsayaatan.

(GIBUSNA)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!