Ni LEONARDO ROSQUETA AGONOY
TI Bannawag ti kaunaan ken kangrunaan a magasin a nakagutigotan ti essemko nga agbasa kadagiti naliteraturaan a sinurat kas iti daniw, sarita, nobela, salaysay, ken dadduma pay; nangruna iti Literatura nga Ilokano.
Maysa nga am-ammo a nasangaili ti pamiliami. Managbasa ket adda pay balonna nga adu a kopia ti Bannawag. Immayda nakigapas iti lugarmi a Brgy. Baresbes iti Dingras, Ilocos Norte. Binulodko ti kopiana ket daydi ti umuna a panagbasak iti Bannawag. Iti damo pay laeng a pannakabasak iti linaon ti Bannawag a sarita, daniw, salaysay, nobela a prosa, ken kasta met ti nadumaduma a kolum agraman damdamag, naparegta ti gagarko nga agbasa. Uray daanen a bilang ti Bannawag, nagmayat man a basbasaen. Ngalay ti 1995 dayta idi. Idi kuan, kayatkon a mabasa ti kabarbaro a bilang ti Bannawag, isu a linawasen ti panagpagatangko kadaydi nanangmi a llinawas nga agudong iti ili tapno makitienda iti taraon ken masapsapulmi. No awan magatang daydi nanangmi a kopia, siak a mismon ti agudong iti sumaruno nga aldaw tapno maaddaanak laeng iti segseggaak a bilang ti Bannawag.
Makaguyugoy dagiti balikas kaniak. Iti panagriknak, saan nga adayo iti puso ken panunotko dagiti balikas. Gapu iti Bannawag, mabasbasak dagiti balikas a mangmangngegko kadagiti pintek nga Ilokano, nangruna dagiti natataengan. Kas koma dagiti pinanday a balikas a pinartuat daydi maingel a mannurat nga Ilokano, daydi Apo Leon C. Pichay, kas iti “bato ni lagip” (monumento) a pinagbalinna a maymaysa a balikas: “batonlagip.”
Saanko nga inarapaap ti agbalin a mannurat. Ngem adda nabasak idi a sarita iti Bannawag a nakapakaritak a mangiburay iti reaksion wenno kapanunotak. Insuratko iti ima daydi nasangal/nabukelko a saludsod/kapanunotan a kayatko nga ibinglay kadagiti agbasbasa iti Bannawag. Rimmuar iti benneg a “Dakami Met” daydi a naisurat iti ima nga impatulodko iti Bannawag. Makasuratak met gayam. Ket nai-Bannawag pay ketdi. Daytan ti rugina a "kayatko" metten ti agbalin koma met a mannurat.
TI BANNAWAG KEN SIAK (41): Kasla Adda Naglukat a Baro a Lubong
Intuloyko ti linawas a gumatang iti Bannawag. Saan a kompleto ti aldawko no diak makabasa ti Bannawag. Idi agangay, nasorpresaak iti naawatko a surat ni Apo Juan S. P. Hidalgo Jr. Napetsaan iti Agosto 10, 1996. Impakaammo ni Apo Johnny a paw-itannak kano iti kopia ti uppat a pocketbook ti nobelita nga Ilokano nga impablaak ti binuangayna a publikasion (nagretiro idin ni Apo Johnny iti Bannawag). Kangrunaanna, impaganetgetna nga ituloyko ti agbasa ken agsurat ket nangisapit pay ni Apo Johnny iti pagadalak iti ortograpia ti Ilokano. Ad-adda a naparegtaak nga agbasa ken agsurat ta addan bagnosko no kasano a buklek dagiti balikas iti umno a patang (sentence).
Ti Bannawag, nagbalin a silaw-bagnosko tapno taluntonek ti dana iti panagsuratan iti lubong ti Literatura nga Ilokano. Nakidardar-ayak iti tinawen a kombension ti gunglo dagiti mannurat nga ilokano, ti GUMIL Filipinas. Immuna a nakadar-ayak idi 2002, iti kombension ti gunglo a naangay idiay UNP-Vigan ken idiay Suso ni Aran Beach Resort, a kukua daydi Laureado a Mannaniw ti Kailokuan, Dr. Godofredo S. Reyes ti Sta. Maria, Ilocos Sur.
Maysaak met kadagiti napili a writing fellow ti Pasnaan 2010, ti umuna a pannakaisayangkat ti serye ti literary workshop a proyekto ti GUMIL Filipinas. Naangay daytoy iti Currimao, Ilocos Norte. Malaksid nga adu ti naadalko iti dayta a workshop, nakitak ken naam-ammok pay dagiti agkakalaing a mannurat a mabasabasak iti Bannawag. Intultuloyko ngarud ti agbasa iti Bannawag ken agsurat. Agsursuratak iti nadumaduma a publikasion iti Kailokuan.
Nakapempen dagiti urnongko a kopia ti Bannawag. Iti las-ud ti nasurok a duapulo a tawen a panaggatgatang ken panagur-urnongko, nasayaat pay laeng ti kasasaad dagiti pempenko a Bannawag. Gameng dagitoy a tartarawidwidanmi a dua iti kasimpungalak a ni Cherry Hazel Reyes-Agonoy, mannaniw ti Bannawag ken nadumaduma a lokal a pagiwarnak. Kaduami metten ni Chloenne Daniw a bunga ti patempategmi, nga uray tallo pay laeng ti tawenna, naayaten a mangkitkita kadagiti urnongmi a Bannawag. –O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
