Isagsaganan ni Presidente Ferdinand "Bongbong" Marcos, Jr. ti pannakaipatungpal ti “Food Stamp Program” agpaay kadagiti 300,000 a pamilia inton Hulio ita a tawen, segun iti Department of Social Welfare and Development (DSWD) itay Mayo 11, 2024.
Ti DSWD ti mangpasingked ken mangirehistro kadagiti 300,000 a pamilia a benepisiario iti “Walang Gutom 2027: Food Stamp Program (FSP)” nga impaulog ni PBBM babaen ti Executive Order No. 44 idi Oktubre, 2023.
Kinuna ni DSWD Undersecretary Edu Punay a nangalada iti 1,000 a validator a mangtingiting kadagiti mabalin a benepisiario kadagiti 21 a probinsia iti 10 a rehion a pakaipatungpalan ti FSP.
Iti FSP, maikkan tunggal benepisiario iti PhP3,000 a food credit kada bulan babaen ti Electronic Benefit Transfer (EBT) card, a mabalin a paggatangda kadagiti nasustansia a taraon kadagiti paglakuan a pinusgan ti DSWD. (Raymund Antonio/Manila Bulletin//Lito Hilidon/Bannawag)
