Napadayawan ni Normalita Garcia-Sonson, Ilokana a tubo ti Galimuyod, Ilocos Sur, a kas maysa kadagiti 2024 Outstanding Fil-Am Teachers iti Goldfarb Elementary School, Clark County School District iti Las Vegas, Nevada, U.S.A. Napili ni Normalita manipud iti rinibu a mannursuro a nagsasalisal iti nasao a distrito. Sangapulo ket talloda a Filipino a napadayawan.

Maysa ni Normalita a mannursuro a makainspirar, makaallukoy kadagiti adalan nangruna dagiti adda kapkapuyna nga ubbing. Adu ti nagun-odna a pammigbig iti pagadalan ken daydayawen dagiti nagannak dagiti kabaelanna kas mannursuro ken maikadua nga ina dagiti annakda.

Iti daytoy nga school year 2023-2024, nagbalin a mentor ni Normalita kadagiti innem a mannursuro a naggapu iti Filipinas maipapan iti programa a “Cultural Exchange Teachers Organization.” Tinawen nga ar-aramidenna daytoy kadagiti Filipino a mannursuro a kassanglad iti Amerika. Iti las-ud ti sangapulo ket walo a tawen a panagisurona iti Goldfarb Elementary School, addan sangapulo ket lima a nabayabayna no kasano a mapatan-ay ti kalidad ti pinilida a kurso ken iti pannakipulapol iti biag ti Amerika, ken kangrunaanna, ti panagisuro kadagiti ganggannaet.

Naturpos ni Normalita ti Master of Education in Advanced Teaching and Leadership, specialized in Teaching English as a Second Language iti Sierra Nevada College iti Lake Tahoe, Nevada; ken Master of Science in Education, specialized in Elementary Reading and Literacy iti Walden University iti Minneapolis, Minnesota.

Ni Normalita ti maikapito nga anak da Florencio O. Garcia ken daydi Norma G. Gandalera ti McKinley, Galimuyod, Ilocos Sur. Ni George A. Sonson, tubo ti Pagangpang, Galimuyod, Ilocos Sur ti asawana ken da Shasta Lorraine ken Julius Jay dagiti annakda a kaduada nga agnanaed iti Las Vegas.

Nagbasa ni Normalita iti McKinley Primary School (McKinley Elementary School itan) iti Grado 1-4. Intuloyna ti Grado 5-6 iti Bugnay Elementary School iti Bugnay Candon City. Nagturpos iti sekundaria iti Pagangpang Barangay High School (Pagangpang National High School itan) iti Galimuyod.

Adu a pannubok ti naglabasan ni Normalita bayat ti panagadalna nangruna iti panagkolehiona. Mannalon laeng dagiti nagannak kenkuana ket marigatanda a mangisakad kadagiti agsasaruno nga annakda nga aggigiddan nga agkolehio. Nakatun-oy iti kolehio ta naipaayan iti scholarship babaen ti Selected Ethnic Group Educational Assistance Program (SEGEAP) nga inlungalong ni Apo Eric D. Singson a diputado idi ti Maikadua a Distrito ti Ilocos Sur. Tinurpos ni Normalita ti Bachelor of Elementary Education iti Saint Louis College iti San Fernando City, La Union. Aapgraduarna, nag-substitute teacher iti Bidbiday Elementary School iti Galimuyod, sa iti San Elias Primary School iti Sigay, Ilocos Sur.

Iti pannakaipermanentena kas mannursuro, naibaon iti maysa a pagadalan iti kabambantayan, iti Baybayading Elementary School iti Salcedo, Ilocos Sur. Tapno madanon, masapul a pagnaen, sang-aten iti tallo nga oras ta narigat ti dalan ket saan a mabalin dagiti lugan. Agingga a “bimmaba” met laeng a nagisuro iti Pagangpang Elementary School.

Tallo a tawennan nga agisursuro idi nasirpat ken nakayawan ni George iti panagbakasion daytoy manipud Hawaii. Kalpasan ti tallo a tawen, nagkaayatanda ket nagkasarda, agingga a napanda idiay Las Vegas.

Iti umuna a tawenna iti Las Vegas, nagbalin a pre-school teacher iti La Petite Academy.  Kalpasan a naipasana ti Teachers Exam ti estado, naipermanente iti makatawen iti Manch Elementary School sa nayakar iti Goldfarb Elementary School a pagisursuruanna agingga ita. (Marlyn Garcia-del Rosario)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!