Rugianen dagiti kameng ti Kamara a pagsasaritaan ti pannakarebisar ti Republic Act (RA) No.11203 wenno ti Rice Tariffication Law (RTL) iti daytoy a lawas, kas kinuna ni House Speaker Martin Romualdez itay Mayo 12, 2024.
Idauluan ni Romualdez ti pannakarebisar ti RTL a manamnama a mangipaay iti nalaklaka a bagas manipud iti National Food Authority (NFA), ket maipababa iti PhP30 tunggal kilo ti bagas manipud iti agdama a presio a PhP40 agingga PhP50 kada kilo.
Naipaulog ti RTL idi 2019, a nangikkat iti karbengan ti NFA a makibiang iti merkado, ket naapektaran ti pannakaipaay ti nalaklaka ngem napintas a klase ti bagas kadagiti Filipino.
Maysa a kangrunaan a mabaliwan iti RTL ti pannakaisubli iti karbengan ti NFA a direkta nga aglako iti nalaklaka a bagas iti merkado.
Manipud Kadagiti Agdama a Kameng ti Bannawag: Dios ti Agngina!
Inggunamgunam ti Department of Agriculture (DA) a ti pannakarebisar ti RTL ti mangpatalged iti presio ti bagas.
Iti mapabaro a RTL, mabalin a gumatang ti NFA kadagiti agang-angkat iti bagas no agkurang ti suplay ti pagilian, no adda pammalubos ti Presidente.
Patibkeren ti mapabaro a RTL ti Bureau of Plant Industry (BPI) tapno masinunuo ti pannakaipatungpal dagiti alagaden iti sanitasion ken pannakakontrol kadagiti sakit ti mula. (Ellson Quismorio/Manila Bulletin//Lito Hilidon/Bannawag)
