Aprobadon iti Kamara iti maikadua a pannakaibasa (second reading) ti gakat a pannakaamendar iti Republic Act (RA) No. 11203 wenno ti Rice Tariffication Law (RTL) itay Mayo 14, 2024.
Iti House Bill (HB) No. 10381 wenno gakat a pannaamendar ti RTL a naipulog idi 2019, maisubli ti sigud a mandato ti National Food Authority (NFA) iti suplay ti bagas iti pagilian.
Iti agdama nga RTL, maiparit iti NFA a gumatang ken aglako iti bagas tapno maipababa ti presio daytoy no umado ti suplay. Ngem sipud idi naipaulog ti RTL, ngimmina latta ti bagas.
Kinuna ni Bataan 1st district Rep. Geraldine Roman a ti pannakaamendar ti RTL ti maysa a mangipakita iti panangipateg kadagiti mannalon a mangipapaay iti taraon kadagiti Filipino.
Manipud Kadagiti Agdama a Kameng ti Bannawag: Dios ti Agngina!
Manamnama a maaprobaran ti HB No. 10381 iti maikatlo a pannakaibasana sakbay nga agserra ti regular a sesion ti maika-19 a Kongreso inton umay a lawas. (Dexter Barro II/Manila Bulletin//Lito Hilidon/Bannawag)
