Dua a pinsal ken maysa a rukib ti pinasiar dagiti kameng ti cultural mapping team ti Quirino iti naangay a Natural Heritage Site Tour and Cultural Mapping Activity itay Mayo 15-17, 2024 nga inwayat ti Quirino Provincial Tourism Office.
Kameng ti cultural mapping team ti DepEd (Department of Education) Quirino, Philippine Information Agency (PIA), ken dagiti nadumaduma a Municipal Tourism Officer iti probinsia.
Idi Mayo 15, pinasiar ti cultural mapping team ti Ganano Falls, maysa a Natural Heritage Site ti Quirino, a masarakan iti Baguio Village, Ili ti Diffun.
Imbinglay dagiti panglakayen ken opisial ti Barangay Baguio, nga idauluan ni Barangay Captain Dario Tibuldec, dagiti ammoda mainaig iti Ganano Falls.
Manipud Kadagiti Agdama a Kameng ti Bannawag: Dios ti Agngina!
Sinukisok met dagiti kameng ti cultural mapping team ti Banuar Cave iti Barangay Banuar, ili ti Cabarroguis itay Mayo 16.
Binayabayan ida dagiti opisial ti Barangay Banuar nga idauluan ni Barangay Captain Alex Tangonan.
Pinasiar met ti cultural mapping team itay Mayo 17 ti Claredita Falls iti Barangay Victoria, Aglipay.
Inimtuodda dagiti panglakayen ken opisial ti barangay nga idauluan ni Barangay Captain Alfredo Rufino, a nangisarita maipapan iti historia ti dissuor.
Mailanad ti pakasaritaan dagiti nadakamat a Natural Heritage Site, ken agbalin a paset ti nakaitalimengan dagiti maibilang a gameng ti probinsia ti Quirino. (Teksto ken Ladawan: Pammadayaw ti Quirino Province Official Facebook Page//Lito Hilidon/Bannawag)
